நாசா வேலைக்கு விண்ணப்பித்த குட்டிப்பையனுக்குப் பாராட்டு

பூமியைப் பாதுகாக்க பிரபஞ்ச பாதுகாப்பு அதிகாரி ஒருவரை நியமிக்கப்போவதாக நாசா அறிவித்ததைத் தொடர்ந்து அந்தப் பணிக்கு விண்ணப்பித்த 9 வயது குட்டிப்பையனை நாசா பாராட்டியுள்ளது.

பூமி உள்ள பல கோள்களைப் பாதுகாக்க நாசா மிகவும் மெனக்கெடுகிறது. அதனால், கோள்களைப் பாதுகாக்கும் பணியை கவனிக்க பிரபஞ்ச பாதுகாப்பு அதிகாரி (Planetary Protection Officer) என்று ஒருவரை நியமிக்க இருப்பதாக நாசா அறிக்கை வெளியிட்டது.

விண்வெளியில் இருப்பவர்கள் கிரகங்களையும் அவற்றின் துணைக்கோள்களையும் மாசுபடுத்தாமல் கண்காணிப்பது அந்த அதிகாரியின் பணி ஆகும். இதற்காக, அந்த அதிகாரிக்கு ஓர் ஆண்டுக்கு ரூ.1.2 கோடி சம்பளம் மற்றும் பல சலுகைகள் கொடுக்கப்படும். அவரது பதவிக்காலம் 3 ஆண்டுகள். தேவைப்பட்டால், 5 ஆண்டுகளாக நீட்டிக்கப்படும்.

இந்த வேலைக்கு விண்ணப்பிக்க ஆசைப்படுபவர்கள் அரசு உயர் அதிகாரியாக ஒரு வருடமாவது வேலை பார்த்த அனுபவம் பெற்றிருக்க வேண்டும். இயற்பியல், பொறியியல், கணிதம் ஆகிய ஏதேனும் ஒரு துறையில் பட்டம் பெற்றிருக்க வேண்டும். முக்கியமான கண்டிஷன் விண்ணப்பதாரர் அமெரிக்கராக மட்டுமே இருக்க வேண்டும்.



இந்தப் பணிக்கு அமெரிக்காவைச் சேர்ந்த ஜேக் டேவிஸ் என்ற 9 வயது சிறுவன் விண்ணப்பித்துள்ளான். “எனக்கு 9 வயதுதான் என்றாலும் இந்த வேலையை நான் சரியாகச் செய்வேன். என் சகோதரி என்னை ஏலியன் என்றுதான் கூப்பிடுவாள். மேலும், எனக்குத் தெரிந்த எல்லா ஏலியன் திரைப்படங்களையும் பார்த்திருக்கிறேன்” என்று டேவிஸ் தன் விண்ணப்பக் கடிதத்தில் குறிப்பிட்டுள்ளான்.



இந்த சிறுவனின் ஆர்வத்தைப் பாராட்டி நாசா பதில் கடிதம் அனுப்பி பாராட்டு தெரிவித்துள்ளது.