அமெரிக்காவில் வரும் நவம்பர் 3ஆம் தேதியன்று அதிபர் தேர்தல் நடைபெறவிருக்கிறது. இதில் ரிபப்ளிகன் கட்சி சார்பில் தற்போதைய அதிபர் டொனால்ட் ட்ரம்ப் மீண்டும் போட்டியிடுகிறார். அவரை எதிர்த்து டெமாக்ட்ரடிக் கட்சி சார்பில் முன்னாள் துணை அதிபர் ஜோ பைடன் போட்டியிடுகிறார்.

இதையொட்டி தேர்தல் களம் அமெரிக்காவில் சூடுபிடித்துள்ளது. அமெரிக்காவின் ஜனநாயக மரபின்படி இரு வேட்பாளர்களுக்கும் இடையேயான நேரடி விவாதம் நேற்று முன் தினம் தொடங்கியது. இதில் விவாதம் என்பதை கடந்து இருவரும் ஒருவரை ஒருவர் கடுமையாக தாக்கி பேசினர். மேலும், தனிநபர் விவகாரங்கள், குடும்பம் வரை இழுத்துவிட்டனர்.

பதவி விலக மாட்டேன் : அடம்பிடிக்கும் ட்ரம்ப்

இருவருக்கும் இடையேயான விவாதம் காரசாரமாக நடைபெறும் என எதிர்பார்க்கப்பட்ட நிலையில், மக்களுக்கு அதிருப்தியே மிஞ்சியது. இந்நிலையில், கனடா நாட்டின் குடியுரிமை பெறுவது எப்படி என கூகுளில் அமெரிக்கர்கள் ஏராளமானோர் தேடி வருகின்றனர். இதைத்தொடர்ந்து ‘move to canada' என்ற தேடல் கூகுளில் ட்ரெண்ட் ஆகியுள்ளது.

இரு வேட்பாளர்களும் மேற்கொண்ட விவாதம் அதிருப்தியை ஏற்படுத்தியுள்ளதால் சொந்த நாட்டையே விட்டுவிட்டு கனடா செல்ல ஏராளமானோர் திட்டமிட்டு வருகின்றனர். இதனால், கனடா செல்வது எப்படி, கனடாவில் நிரந்தர குடியுரிமை பெறுவது எப்படி என ஏராளமானோர் தேடியுள்ளதாக கூகுள் தெரிவித்துள்ளது.

இதில் மசாசூசெட்ஸ் மாகாணத்தை சேர்ந்த மக்கள் ஏராளமானோர் கனடா செல்வது குறித்து கூகுளில் தேடியுள்ளனர். அதற்கு அடுத்தபடியாக ஓஹியோ, மிச்சிகன் மாகாணங்களை சேர்ந்தவர்கள் அதிகம் தேடியுள்ளனர்.