அமெரிக்காவில் அம்மா உணவகம்

அமெரிக்காவில் வெள்ளத்தால் பாதிக்கப்பட்டவர்களுக்காக தினேஷ்குமார் என்பவர் அம்மாஸ் கிச்சன் என்ற பெயரில், இலவசமாக உணவு வழங்கி வருகிறார்.

அமெரிக்காவில் இர்மா புயல் கடந்த பின்பும், அதன் பாதிப்பில் இருந்து அங்குள்ள மக்கள் மீள முடியாமல் தவித்து வருகின்றனர்.

சென்னையில் வெள்ள பாதிப்பின் போது நமது மக்கள் எப்படி அல்லல் அடைந்தார்களோ அதே போல, அங்குள்ள மக்களும் வீடு வாசல் இழந்து தவித்து வருகின்றனர். புளோரிடா மாகாணத்திலிருந்த பெருவாரியான மக்கள் பாதுகாப்பான இடத்துக்கு கொண்டு செல்லப்பட்டனர்.


இந்நிலையில், அங்குள்ள தமிழக உணவு விடுதியான அம்மா கிச்சன், வெள்ளத்தில் பாதித்த மக்களுக்கு இலவசமாக உணவு வழங்கி வருகிறது.

தமிழகத்தில் ஜெயலலிதாவால் கொண்டு வரப்பட்ட அம்மா உணவகத்தைப் பின்பற்றி அதே பாணியில் அம்மாஸ் கிச்சன் என்ற பெயரில் நியூஜெர்சி, புளோரிடா, டெக்சாஸ் ஆகிய 3 இடங்களில் தினேஷ்குமார் என்பவர் உணவு விடுதி நடத்தி வருகிறார்.

ஒட்டல் மேனேஜ்மெண்ட் படித்த இவர், அமெரிக்காவில் வாழும் தமிழர்களுக்காக இந்த உணவு விடுதியை நடத்தி வருகிறார். குறைந்த விலையில், நல்ல உணவு வழங்குவதால், இவருடைய உணவு விடுதிக்கு நல்ல வரவேற்பு உள்ளது.

அம்மாஸ் கிச்சனில் ஒரு டாலருக்கு இட்லி, வடை போன்ற டிபன் வகைகளும், 7 டாலருக்கு பிரியாணி வகைகளும் விற்கப்படுகிறது. இதை விட சிறப்பான விஷயம் என்னவெனில், இங்குள்ள உணவு வகைகள் அனைத்தும் இயற்கையான முறையில் தயாரிக்கப்படுவதாகும்.