கலிபோர்னியா காட்டுத் தீயில் சிக்கி 9 பேர் உயிரிழப்பு!

அமெரிக்காவின் கலிபோர்னியா மாகாணத்தில் பரவி வரும் காட்டுத் தீயில் சிக்கி இதுவரை 9 பேர் உயிரிழந்துள்ளனர்.

அமெரிக்காவின் வட கலிபோர்னியா மாகாணத்தில் 27,000 மக்கள் வசிக்கும் பாரடைஸ் நகர் அருகே கடந்த வியாழக்கிழமை அதிகாலை காட்டுத் தீ உருவானது. அப்போது 56 கி.மீட்டருக்கு மேல் காற்று பலமாக வீசியதால் 6 மணி நேரத்தில் சுமார் 20,000 ஏக்கர் பரப்பளவிற்கு காட்டுத் தீ பரவியது. அதன் காரணமாக ஆயிரக்கணக்கான மரங்கள் நூற்றுக்கணக்கான வீடுகள், கட்டிடங்கள் காட்டுத் தீயில் சிக்கி தீக்கிரையாக்கின.

தற்போது மணிக்கு 35 கிமீ வேகத்தில் தீ பரவி வருவதால் எங்கு பார்த்தாலும் தீப்பிழம்பாக காட்சி அளிக்கிறது. தீப்பிடித்த பகுதிகள் மற்றும் சுற்றுவட்டார பகுதிகளில் வசித்த சுமார் 1.5 லட்சம் மக்கள் பாதுகாப்பாக வெளியேற்றப்பட்டுள்ளனர்.

இந்நிலையில், காட்டுத் தீயில் சிக்கி இதுவரை 9 பேர் உயிரிழந்துள்ளனர். 35 பேரை காணவில்லை. தீப்பிடித்த பகுதிகளில் மீட்பு பணிகள் மேற்கொள்ள முடியாத அளவிற்கு நிலைமை மோசமாக உள்ளதால், உயிரிழப்பு மேலும் அதிகரிக்கலாம் என்று எதிர்பார்க்கப்படுகிறது. நூற்றுக்கணக்கான தீயணைப்பு வீரர்கள் தீயைக் கட்டுப்படுத்த கடுமையாகப் போராடி வருகின்றனர்.

இதனிடையே வடக்கு கலிபோர்னியாவின் பெரும்பாலான பகுதிகளுக்கு ரெட் அலர்ட் எச்சரிக்கை விடுக்கப்பட்டுள்ளது குறிப்பிடத்தக்கது.