ஆஸி.யில் இந்திய மத போதகர் மீது தாக்குதல்

மெல்போர்ன்: ஆஸ்திரேலியாவில் இந்தியாவைச் சேர்ந்த கிறிஸ்துவ மத போதகர் ஒருவர் தாக்கப்பட்டுள்ளார்.

ஆஸ்திரேலிய நாட்டின் மெல்போர்ன் நகரில் இந்தியாவைச் சேர்ந்த மத போதகர் மேத்யூ அடையாளம் தெரியாத நபரால் தாக்கப்பட்டார். கிறிஸ்துவ தேவாலத்திற்குள் அனைவர் முன்னிலையிலும் இந்தத் தாக்குதல் நடந்திருக்கிறது.

கத்தியால் கழுத்தில் தாக்கப்பட்டதால் உடனடியாக மருத்துவமனைக்குக் கொண்டு செல்லப்பட்ட அவர் சிகிச்சைக்குப் பின் உயிர்தப்பினார்.

மேத்யூவைத் தாக்கிய நபரைப் பிடித்து அந்நாட்டு காவல்துறையினர் விசாரணை செய்தனர். இதில், அந்த நபர் இத்தாலி வம்சாவளியைச் சேர்ந்தவர் என்றும் 72 வயதான அவரது பெயர் பவுக்னர் என்றும் தெரிந்தது.

அமெரிக்கா, நியூசிலாந்தைத் தொடர்ந்து ஆஸ்திரேலியாவிலும் இந்தியர்களுக்கு எதிரான விரோதப் போக்கு தலைதூக்கியுள்ளது குறிப்பிடத்தக்கது.