அமெரிக்கா பொருட்களுக்கு 25 சதவீதம் வரை வரி அதிகரித்து கனடா பதிலடி

கனடாவில் உற்பத்தியாகும் அலுமினியப் பொருட்களுக்கு அமெரிக்க அரசு வரி அதிகரித்துள்ளதன் காரணமாக தற்போது கனடா அரசு, அமெரிக்க தயாரிப்பு பொருட்களுக்கு வரியை அதிகரித்து பதிலடி கொடுத்துள்ளது.

கனடா உள்ளிட்ட, ஐரோப்பிய ஒன்றியம் மற்றும் மெக்சிகோ உள்ளிட்ட நாடுகளில் உற்பத்தி செய்யப்பட்டு இறக்குமதியாகும் இரும்பு மற்றும் அலுமினியப் பொருட்களுக்கு அமெரிக்க அரசு 25 சதவீத வரி விதிக்கப்படும் என்று தெரிவித்துள்ளது.

இதன்மூலம் குறிப்பிட்ட நாடுகளை சேர்ந்த பொருட்களுக்கு அளிக்கப்பட்டு வந்த வரி விலக்கு சலுகை ரத்து செய்யப்படுவதாக அமெரிக்க அதிபர் டொனால்டு டிரம்ப் சமீபத்தில் தெரிவித்தார்.

இதுகுறித்து கருத்து தெரிவித்த கனடா நாட்டு பிரதமர் ஜஸ்டின் ட்ரூடோ, அமெரிக்காவின் வரி விதிப்பு ஏற்க முடியாத ஒன்று எனவும், தொழிலாலர் மீதான அக்கறை கனடாவிற்கு இருப்பதாக தெரிவித்தார்.

தொடர்ந்து அவர், அமெரிக்காவிலிருந்து இறக்குமதி செய்யப்படும் பொருட்களுக்கு வரி விதிக்கப்படும் என தெரிவித்த ஜஸ்டின் ட்ரூடோ, இன்று முதல் புதிய வரி விதிப்பு நடைமுறைக்கு வரும் என்று கூறி பதிலடி கொடுத்துள்ளார்.

மேலும், வரி விதிப்படும் அமெரிக்க பொருட்களுக்கான பட்டியலை கனடா வெளியிட்டுள்ளது. அதில் குறிப்பிட்ட பொருட்களுக்கு 10 முதல் 25 சதவீதம் வரை வரி உயர்த்தப்பட்டுள்ளது.

இதன்மூலம், ரூ. 86 ஆயிரம் கோடி அளவிற்கு அமெரிக்க பொருட்கள் மீதான வரி உயர்த்தப்பட்டுள்ளது தெரியவந்துள்ளது.