பாகிஸ்தான் இடைக்கால பிரதமராகிறார் பாதுகாப்புத்துறை அமைச்சர் அசிப்?!

பாகிஸ்தான் இடைக்கால பிரதமராக பாதுகாப்புத்துறை அமைச்சர் கவாஜா அசிப் பதவியேற்கலாம் என்ற செய்தி வெளியாகியுள்ளது. இவர் இந்தப் பதவியில் 45 நாட்களுக்கு நீடிப்பார் என்று கூறப்படுகிறது.

பனாமா வழக்கில் பாகிஸ்தான் பிரதமர் நவாஸ் ஷெரீப் பதவியில் இருந்து தகுதி நீக்கம் செய்யப்பட்டார். அவர் மீது வழுவான சாட்சியங்கள் இருப்பதால், அவர் மீது கிரிமினல் வழக்கு தொடர அந்த நாட்டின் உச்சநீதிமன்றம் இன்று அதிரடி உத்தரவு பிறப்பித்தது.

கடந்த சில ஆண்டுகளுக்குப் பின்னர் பாகிஸ்தான் நாட்டில் இக்கட்டான அரசியல் சூழல் உருவாகியுள்ளது. அந்த நாட்டு மக்களால் தேர்வு செய்யப்பட்டு பதவிக் காலம் முழுமை அடையும் முன்பு இன்று பதவியை, பனாமா ஊழல் வழக்கின் கீழ் நவாஸ் ஷெரீப் இழந்தார். இவரது குடும்பம் வெளிநாட்டில் சொத்துக்கள் வாங்கி குவித்து இருக்கிறது என்பதற்கான வழுவான ஆதாரங்கள் உள்ளது என்று அந்த நாட்டின் உச்சநீதிமன்றமே கூறியிருப்பது, நவாஸ் ஷெரீப்பின் எதிர்கால அரசியலில் விழுந்த கரும்புள்ளியாக பார்க்கப்படுகிறது.

மூன்று முறை பிரதமர் பதவி வகித்த நவாஸ் ஷெரீப் அரசியல் வாழ்க்கை இத்துடன் முடிவுக்கு வருமா என்ற சந்தேகத்தை ஏற்படுத்தியுள்ளது. இவருக்குப் பின்னர் அந்த நாட்டின் பிரதமராக அவரது சகோதரர் பதவியேற்கலாம் என்று கூறப்படுகிறது. அவர் அப்படி பதவியேற்றாலும் டம்மி பிரதமராகத் தான் இருப்பார். ஆட்டுவிப்பவராக நவாஸ் ஷெரீப் இருப்பார்.

மேலும், இந்த வழக்கிற்கு பாகிஸ்தானின் தெஹ்ரிக் இ இன்சான் கட்சித் தலைவர் இம்ரான் கான் அழுத்தம் கொடுத்து வந்தார். இந்த நிலையில் இன்று இந்த தீர்ப்பு வெளியாகியுள்ளது.

உச்சநீதிமன்றத்தின் தீர்ப்பின்படி, நவாஸ், அவரது மகன்கள் மற்றும் மகள்கள் மீது வழக்கு விசாரணை மேற்கொள்ளப்படும். பாதுகாப்புத்துறை அமைச்சர் கவாஜா அசிப் அந்த நாட்டின் இடைக்கால பிரதமராக 45 நாட்களுக்கு நீடிப்பார். நவாசின் சகோதரர் இடைத்தேர்தலில் போட்டியிட்டு வெற்றி பெறும் வரை இடைக்கால பிரதமராக அசிப் நீடிப்பார் என்ற தகவல் வெளியாகியுள்ளது.

அடுத்த ஆண்டு தேர்தல் நடைபெற இருக்கும் நிலையில் பாகிஸ்தான் நாட்டில் இக்கட்டான சூழல் உருவாகியுள்ளது. மூன்று முறையும் பதவிக்காலம் முடியும் முன்பு பதவிக்காலம் இழந்தார் நவாஸ் என்பது குறிப்பிடத்தக்கது.

Defence Minister Khawaja Asif is likely to become the interim PM for 45 days.