இந்தியாவுக்கு டிரம்ப் எச்சரிக்கை!

இந்தியாவுக்கு இறக்குமதி செய்யப்படும் அமெரிக்க பொருட்களின் விலை மீதான வரியை குறைக்க வேண்டும் என்று அதிபர் ட்ரம்ப் எச்சரித்துள்ளார்.

அமெரிக்காவில் தயாரிக்கப்படும் பொருட்கள் உலகின் பல்வேறு நாடுகளில் இறக்குமதி செய்யப்பட்டு விற்பனை செய்யப்பட்டு வருகிறது. இதில், இந்தியாவும் சீனாவும் அமெரிக்க பொருட்கள் மீது அதிக வரியை விதித்துள்ளது. ஆனால், அமெரிக்காவிலோ இந்திய பொருட்களுக்கு மிக குறைந்த வரியே விதித்துள்ளது. இந்த குறைந்த வரி காரணமாக அமெரிக்க சந்தையில் இந்திய பொருட்கள் அதிக அளவு இருக்கிறது.

இந்நிலையில், இந்தியாவுக்கு இறக்குமதி செய்யப்படும் அமெரிக்க பொருட்களின் விலை மீதான வரியை குறைக்க வேண்டும் என்று அதிபர் ட்ரம்ப் எச்சரித்துள்ளார்.

இது குறித்து அவர் கூறுகையில், இந்தியாவில் இறக்குமதி செய்யப்படும் அமெரிக்க மோட்டார் வாகனங்கள் ஹார்லி டேவிட்சன் உள்ளிட்ட பொருட்களுக்கு 50 சதவீதம் வரி விதிக்கப்பட்டுள்ளதாகவும், இதே போல் சீனாவில் அமெரிக்க கார்களுக்கு 25 சதவீத வரி விதிக்கப்பட்டுள்ளதாகவும் தெரிவித்தார்.

ஆனால், அமெரிக்காவில் சீன கார்களுக்கு 2.5 சதவீத வரி மட்டுமே விதிக்கப்படுவதாகவும் இது சரியான வர்த்தகம் இல்லை என்றும் கூறியுள்ளார்.

மேலும், சீனா, இந்தியா நாடுகளில் அமெரிக்க பொருட்களின் மீதான வரியை குறைக்காவிட்டால், அவர்கள் விதித்துள்ள வரியைப் போலவே அமெரிக்காவிலும் அவர்கள் நாட்டிலிருந்து இறக்குமதி செய்யப்படும் பொருட்களுக்கு வரி விதிக்கப்படும் என்று எச்சரித்துள்ளார்.