நேபாளம் விமான விபத்து: இதுவரை 19 சடலங்கள் மீட்பு

நேபாளில், சிறிய ரக பயணிகள் விமானம் மலை மீது மோதி விபத்துக்குள்ளான சம்பவத்தில் பலியான 19 பேரின் சடலங்கள் இதுவரை மீட்கப்பட்டுள்ளன.

அந்நாட்டின் மேற்கே மியாடி மாவட்டத்தில், இமயமலைச் சாரலில் புதன்கிழமை அதிகாலை இந்த விபத்து ஏற்பட்டது. கடல்மட்டத்தில் இருந்து, 16 ஆயிரம் அடி உயரத்தில் உள்ள இங்கு,தாரா ஏர் நிறுவனத்திற்குச் சொந்தமான சிறிய ரக பயணிகள் விமானம் மலையில் மோதி விபத்துக்குள்ளானது.

இதில், சீனா,பஹ்ரைன் நாடுகளைச் சேர்ந்த சுற்றுலா பயணிகள்,உள்ளூர் மக்கள்,விமானிகள் உள்பட 23 பேர் பலியானதாக அறிவிக்கப்பட்டது. இதுவரை 19 பேரின் சடலங்கள் மீட்கப்பட்டுள்ளது.

எனினும், பலரது சடலங்கள் சிதறிய நிலையில் உள்ளதால், உடல்பாகங்கள் முழுமையாக கிடைக்கவில்லை என்றும், தேடுதல் பணிகள் தொடர்ந்து நடைபெறுகிறது என்றும் மீட்புப்படையினர் குறிப்பிட்டுள்ளனர்.