பணத்தில் மிதக்கும் 12 வயது குட்டிப்பெண்!

அமெரிக்காவைச் சேர்ந்த 12 வயது சிறுமி கோடிகளில் புரளும் அளவிற்கு லாபகரமான தொழிலதிபராக உருவெடுத்துள்ளார்.

அமெரிக்காவின் டெக்சாஸ் மாகாணத்தைச் சேர்ந்த மிகைலா உல்மர் என்ற சிறுமி, ‘மீ அண்ட் தி பீஸ் லெமனேட்’ என்ற நிறுவனத்தின் தலைவராக இருக்கிறார். 1940ஆம் ஆண்டு மிகைலாவின் பாட்டி தேனுடன், புதினா, ஆளிவிதை, எலுமிச்சை ஆகியவற்றைச் சேர்ந்து ‘பீ ஸ்வீட் லெமனேட்’ என்ற சுவையான இயற்கைப் பானத்தைத் தயாரித்தார்.

நான்கு வயதில் தேனீ கடித்தபோது, மிகைலாவுக்கு தேனீக்களைப் பற்றி தெரிந்துகொள்ள வேண்டும் என்ற ஆர்வம் ஏற்பட்டிருக்கிறது. தேனீக்களைப் பற்றிய புத்தகங்கள் பலவற்றைப் படித்த பிறகு, பாட்டியின் இந்த புதிய பானத்தை விற்க வேண்டும் என்ற எண்ணம் மிகைலாவிடம் உருவாகியிருக்கிறது.

இந்த எண்ணம் 2009ஆம் ஆண்டு ‘பீ ஸ்வீட் லெமனேட்’ நிறுவனம் உருவாக காரணமாக அமைந்திருக்கிறது.

இந்த பானத்தை விற்க நாடு முழுவதும் கிளைகள் உள்ள சூப்பர் மார்க்கெட் நிறுவனம் ஒன்று ரூ. 70 கோடிக்கு ஒப்பந்தம் செய்திருக்கிறது. ‘ஷார்க் டாங்க்’ என்ற தொலைக்காட்சி நிகழ்ச்சி மூலம் ரூ.38.59 லட்சம் முதலீடு கிடைத்துள்ளது.

இவரது அபாரமான வளர்ச்சிக்கு அங்கீகாரமாக 2016ஆம் ஆண்டின் சிறந்த சில்லறை வர்த்தகர் விருதை பெற்றுள்ளார் மிகைலா. முன்னாள் அமெரிக்க அதிபர் பராக் ஒபாமாவின் பாராட்டையும் பெற்றிருக்கிறார்.

தனக்குக் கிடைக்கும் லாபத்தில் குறிப்பிட்ட தொகையை தேனீ வளர்ப்புக்காக செலவழிக்கும் மிகைலா, தேனீக்கள் இனத்தைப் பாதுகாப்பதே என்னுடைய குறிக்கோள் என்று கூறுகிறார்.