ஈரான் அதிபர் தேர்தல்: பதவியைத் தக்கவைத்தார் ஹசன் ரௌஹானி

ஈரான் நாட்டில் நேற்று நடைபெற்ற அதிபர் தேர்தலில் இடைக்கால அதிபராக பதவியில் உள்ள ஹசன் ரௌஹானி அமோக வெற்றி பெற்று பதவியைத் தக்கவைத்துக்கொண்டதாக அந்நாட்டு செய்தி நிறுவனங்கள் தெரிவிக்கின்றன.

ஈரான் நாட்டின் அதிபர் தேர்தல் நேற்று (மே 19ஆம் தேதி) நடைபெற்றது. இத்தேர்தலில் அந்நாட்டின் இடைக்கால அதிபராக பதவியில் தொடரும் ஹசன் ரௌஹானி அமோக வெற்றிபெற்று பதவியைத் தக்கவைத்துக்கொண்டுள்ளார் என்று தகவல் வெளியாகியுள்ளது. அணு ஆயுத ஒப்பந்தங்கள் மீது மக்களுக்கு அதிருப்தி இருந்தபோதும், இத்தேர்தலில் ரௌஹானி பெற்றுள்ள வெற்றி அவருக்கு மக்களிடன் உள்ள செல்வாக்கு இன்னும் குறையவில்லை என்று உறுதியாகியுள்ளது.

ரௌஹானி தன்னை எதிர்த்துப்போட்டியிட்ட இப்ராஹிம் ரெய்ஸியை பின்னுக்குத் தள்ளி வெற்றிபெற்றார். அவருக்கு 56.88 சதவீதம் வாக்குகள் கிடைத்துள்ளன. ரெய்ஸிக்கு 38.55 சதவீதம் வாக்குகள் மட்டுமே கிடைத்துள்ளன.

பிற அதிபர் பதவி வேட்பாளர்களான முஸ்தபா மிர்சலீம் மற்றும் முஸ்தபா ஹஷிமிடாபா ஆகியோர் முறையே 1.13 மற்றும் 0.52 சதவீதம் வாக்குகள் பெற்றுள்ளனர்.

அந்நாட்டில் உள்ள சுமார் 5 கோடியே 60 லட்சம் வாக்காளர்களில் 4 கோடிக்கும் அதிகமானோர் இத்தேர்தலில் வாக்களித்துள்ளனர்.