87 ரூபாயில் வீடு வாங்கலாம்: அட்டகாசமான ஆஃபர்!

இத்தாலி நாட்டில் சிசிலி பகுதியின் தென் மேற்கு பகுதில் இருக்கும் நகரம் சலேமி. மிகவும் அழகு பொருந்திய இந்நகரம் இத்தாலியின் வரலாற்று சிறப்புமிக்க தலங்களில் ஒன்று. இதை சுற்றி ஏராளமான திராட்சை தோட்டங்களும், ஆலிவ் தோப்புகளும் இருக்கின்றன.

மிக பழைமையான நகரமான சலேமியில் 1600களில் கட்டமைக்கப்பட்ட சுவர்கள் இன்னும் கம்பீரமாக நின்றுகொண்டிருக்கின்றன. 1968ஆம் ஆண்டு ஏற்பட்ட நிலநடுக்கத்தால் சலேமி நகரத்தில் இருந்து 4000க்கும் மேற்பட்ட மக்கள் வெளியேறிவிட்டனர். தற்போது சலேமி ஒரு கைவிடப்பட்ட நகரமாக இருக்கிறது.

சலேமி நகரத்திற்கு மீண்டும் புத்துயிர் கொடுப்பதற்காக அங்கிருக்கும் வீடுகளை வெறும் 1 யூரோவுக்கு ஏலத்தில் விற்பனை செய்ய இத்தாலி அரசு முடிவு செய்துள்ளது. ஒரு யூரோவின் இந்திய ரூபாய் மதிப்பு 87 ரூபாய். இத்தாலில் ஒரு யூரோ என்பது ஒரு கப் காபியின் விலையை விட குறைவு.

தற்போது சலேமியில் இருக்கும் அனைத்து வீடுகளும் நகர கவுன்சிலுக்கு சொந்தமானவையாக இருக்கின்றன. இவற்றை ஒரு யூரோவுக்கு விற்பனை செய்வதால் கைவிடப்பட்ட அழகிய சலேமி நகருக்கு புத்துயிர் கிடைக்கும் என நம்புவதாக சலேமி மேயர் டொமெனிகோ வெனுடி தெரிவித்துள்ளார். இப்போது சலேமி அடுத்தகட்டத்துக்கு தயாராகிவிட்டதாக அவர் தெரிவித்தார்.

கடந்த சில ஆண்டுகளில் பல்வேறு கைவிடப்பட்ட இத்தாலிய நகரங்களில் மிகக் குறைவான விலைக்கு வீடுகள் விற்பனைக்கு வந்தன. மக்கள் வெளியேற்றத்தை தடுக்கவும், புதிய மக்களை அழைத்துவந்து பழைய நகரங்களுக்கு புத்துயிர் ஊட்டவும் குறைந்த விலையில் வீடுகள் விற்பனை செய்யப்படுகிறது. கடந்த ஆண்டு தெற்கு இத்தாலியில் உள்ள சம்புகா நகரில் வெறும் ஒரு டாலருக்கு வீடுகள் விற்பனை செய்யப்பட்டது.