மாலத்தீவு அதிபர் தேர்தலில் எதிர்க்கட்சி தலைவர் இப்ராகிம் முகமது அபார வெற்றி!

தெற்காசிய நாடாக இருக்கும் மாலத்தீவில் 1,192 குட்டித் தீவுகள் இருக்கின்றன. அங்கு சிறைத் தண்டனை விதிக்கப்பட்ட முன்னாள் அதிபர் முகமது நஷீத் உள்ளிட்ட 9 அரசியல் தலைவர்களை விடுதலை செய்ய, அந்நாட்டின் உச்சநீதிமன்றம் உத்தரவிட்டது.

ஆனால் இந்த தீர்ப்பை அதிபர் அப்துல்லா யாமீன் ஏற்க மறுத்தார். அதிபர் நிலைப்பாட்டுக்கு எதிராக தீர்ப்பு வழங்கிய உச்சநீதிமன்ற நீதிபதிகள் அதிரடியாக கைது செய்யப்பட்டனர். இதனால் நெருக்கடி நிலை பிரகடனப் படுத்தப்பட்டது. இதைத் தொடர்ந்து மீதிமிருந்த உச்சநீதிமன்ற நீதிபதிகள் விடுதலை உத்தரவை திரும்ப பெற்றனர்.

இத்தகைய அரசியல் குழப்பங்களுக்கு இடையே நேற்று அதிபர் தேர்தல் நடைபெற்றது. அதில் மாலத்தீவு முன்னேற்ற கட்சி சார்பில் அதிபர் அப்துல்லா யாமீனும், மாலத்தீவு ஜனநாயக கட்சி சார்பில் இப்ராகிம் முகமதுவும் போட்டியிட்டனர். வாக்குப்பதிவு நிறைவு பெற்ற பின்னர், உடனடியாக வாக்குகள் எண்ணும் பணிகள் தொடங்கப்பட்டன.

இதில் ஆரம்பம் முதலே அதிபர் அப்துல்லா யாமீன் பின் தங்கியிருந்தார். இறுதியில் எதிர்க்கட்சி சார்பில் போட்டியிட்ட இப்ராகிம் முகமது 58.3% வாக்குகள் பெற்று வெற்றி பெற்றார்.

இதில் இப்ராகிம் முகமது 1,33,808 வாக்குகளும், அப்துல்லா யாமீன் 95,526 வாக்குகள் பெற்றனர். இந்த வெற்றியை முகமதுவின் ஆதரவாளர்கள் உற்சாகமாக கொண்டாடி வருகின்றனர்.

Maldives opposition claims presidential election victory.