முட்டாள் ஹிலாரியா? அறிவாளி டொனால்டா?: வடகொரியா சர்ச்சை

முட்டாள் ஹிலாரியை விட, அதிபருக்கான அனைத்து தகுதிகளும் குடியரசுக் கட்சி வேட்பாளர் டொனால்டு டிரம்புக்கு இருப்பதாக வடகொரியா கொள்கை பரப்பு இணையதளத்தில் செய்தி வெளியிடப்பட்டுள்ளது.

மேலும், அந்த செய்தியில்,'' அணுகுண்டு பயத்தில் வாழும் அமெரிக்க மக்களை டொனால்டு டிரம்பால் மட்டுமே காப்பாற்ற முடியும். வரும் நவம்பர் 8ஆம் தேதி நடக்கும் தேர்தலில் அமெரிக்க வாக்களார்கள் தேர்ந்தெடுக்க வேண்டிய அறிவாளி அரசியல்வாதி டிரம்ப்'' என்று தெரிவிக்கப்பட்டுள்ளது.

இதை எழுதியவர் சீனாவைச் சேர்ந்த கொரியன் பட்டதாரியான ஹன் யோங் முக் என்பது தெரிய வந்துள்ளது.

சமீபத்தில் செய்தி நிறுவனம் ஒன்றுக்கு பேட்டி அளித்து இருந்த டிரம்ப், ''ஆணு ஆயுதங்களை குறைக்குமாறு பயோங்யாங்குடன் பேச்சுவார்த்தை நடத்துவேன். இதற்கு சீனா உதவ வேண்டும்'' என்று கூறி இருந்தார்.

இதை மேற்கோள் காட்டியிருக்கும் இந்த இணையதள செய்தியில், ''டொனால்டு டிரம்ப் கூறியதற்கு மாறாக, ஜனநாயகக் கட்சி வேட்பாளரான முட்டாள் ஹிலாரி, கொரிய தீபகற்பத்தில் அணு ஆயுதங்களை முடிவுக்கு கொண்டு வர ஈரான் நாட்டைப் போல் பொருளாதாரத் தடைகள் கொண்டு வரப்படும் என்று தெரிவித்துள்ளார்'' என்று கூறப்பட்டுள்ளது.