பாகிஸ்தானுக்கு வக்காலத்து வாங்கும் சீனா: அமெரிக்காவுக்கு கண்டனம்

பயங்கரவாத பிரச்னைகளுக்கு அமெரிக்கா பாகிஸ்தானை குற்றம்சாட்டுவதற்கு சீனா எதிர்ப்பு தெரிவித்துள்ளது.

பயங்கரவாத ஒழிப்பு மற்றும் உட்கட்டமைப்பு பணிகளுக்காக பாகிஸ்தான் அரசு அமெரிக்காவிடம் பெருமளவு நிதியுதவி பெற்று வந்தது. ஆனால், பயங்கரவாத்தை எதிர்த்து எதுவும் செய்யாத பாகிஸ்தான் அரசுக்கு அமெரிக்கா நிதியுதவி அளிப்பதை அண்மையில் நிறுத்திவிட்டது.

மேலும், பாகிஸ்தான் அமெரிக்க நிதியுதவியைப் பெற்றுக்கொண்டு பொய் பித்தலாட்டம் செய்வதாக அமெரிக்க அதிபர் டொனால்ட் ட்ரம்ப் சாடினார். இந்நிலையில் பாகிஸ்தானுக்கு ஆதரவாக சீனா குரல் கொடுத்துள்ளது.

“பயங்கரவாதத்தை ஒழிப்பதற்காக அனைத்து நாடுகளும் தங்கள் உறவை வலுப்படுத்திக்கொள்ள வேண்டும். மாறாக ஒருவரை ஒருவர் மாற்றிமாற்றி சுட்டிக்காட்டி குறைகூறிக்கொண்டிருக்கக் கூடாது.” என்று சீன வெளியுறவுத்துறை செய்தித்தொடர்பாளர் லூ காங் தெரிவித்துள்ளார்.

“எந்தவொரு குறிப்பிட்ட நாட்டையும் பயங்கரவாதத்திற்கு பொறுப்பாக்குவதை சீனா தொடர்ந்து எதிர்த்து வந்துள்ளது” என்றும் “சீனா அழுத்தம் கொடுத்ததன் பேரில் சர்வதேச பயங்கரவாத ஒழிப்புக்காக பாகிஸ்தான் பல தியாகங்களைச் செய்து பங்களித்துள்ளது.” என்றும் அவர் குறிப்பிட்டுள்ளார்.