பாக். வெளியுறவுத்துறை அமைச்சர் தகுதிநீக்கம்: நீதிமன்றம் அதிரடி

சட்டவிரோதமாக ஐக்கிய அரபு எமிரேட்ஸ் நாட்டின், “இக்மா” பணி அனுமதி வைத்திருந்ததற்காக பாகிஸ்தானின் வெளியுறவுத்துறை அமைச்சர் ஹவாஜா ஆசிஃப்பை இஸ்லாமாபாத் உயர்நீதிமன்றம் தகுதிநீக்கம் செய்துள்ளது.

பாகிஸ்தான் நாட்டின் வெளியுறவுத்துறை அமைச்சராக இருக்கும் ஹவாஜா ஆசிப், கடந்த 2013ம் ஆண்டு நடந்த தேர்தலில் போட்டியிட்டு வென்று தேசிய சபைக்கு சென்றார். இவரை எதிர்த்து போட்டியிட்ட, முன்னாள் கிரிக்கெட் வீரர் இம்ரான் கான் என்பவரின் தெரீக் இ இன்சாப் கட்சியை சேர்ந்த உஸ்மான் தார் தோல்வியடைந்தார்.

இந்நிலையில், ஆசிஃப்பிடம், ஐக்கிய அரபு எமிரேட்ஸ் நாட்டின் இக்மா எனப்படும் பணி அனுமதி உள்ளதாகவும், அதை மறைத்து தேர்தலில் போட்டியிட்டுள்ளதாகவும் இஸ்லாமாபாத் உயர்நீதிமன்றத்தில் உஸ்மான் தார் வழக்கு தொடர்ந்தார். மேலும், தேர்தலில் அவர் போட்டியிட்டது செல்லாது என்றும் அவரை தகுதிநக்கம் செய்ய வேண்டும் என்றும் தனது மனுவில் தெரிவித்திருந்தார்.

இந்த வழக்கை விசாரித்த இஸ்லாமாபாத் உயர்நீதிமன்றம், ஹவாஜா ஆசிப்பிடம் இக்மா இருப்பது நிரூபிக்கப்பட்டுள்ளதாகவும் அதை மறைத்து வேட்புமனு அளித்து தேர்தலில் போட்டியிட்டது செல்லாது என்றும் தீர்ப்பு வழங்கியது. இதனால், தற்போது ஆசிஃப் தகுதிநீக்கம் செய்யப்பட்டு, பதவியை இழந்துள்ளார். இதன் காரணமாக அங்கு ஆளும் முஸ்லீம் லீக் கட்சி பெரும் அதிர்ச்சியல் உள்ளது.