யார் சொன்னாலும் கேட்க மாட்டேன்; 4 நாடுகள் நிபந்தனைகளை தூக்கி எறிந்த கத்தார்...!

தோகா: 4 நாடுகள் நிபந்தனைகளை கத்தார் அரசு ஏற்க மறுத்துள்ளது.

தீவிரவாதத்திற்கு துணை புரிவதாக கூறி கத்தார் மீது, சவுதி, எகிப்து, ஐக்கிய அரபு, பஹ்ரைன் உள்ளிட்ட நாடுகள் பல்வேறு தடைகளை விதித்துள்ளன. இந்நாடுகள் கத்தாருக்கு பொருட்கள் ஏற்றுமதியை நிறுத்திக் கொண்டு, தங்கள் எல்லைகளையும் மூடியுள்ளன. இதனைத் தொடர்ந்து தங்கள் மீதான தடைகளை விலக்கிக் கொள்ள கத்தார் வேண்டுகோள் விடுத்தது. சமரசம் செய்ய வந்த அமெரிக்காவும், ஒன்றிணைந்து செயல்படுமாறு அறிவுறுத்தியது. இந்நிலையில் சவுதி உள்ளிட்ட 4 நாடுகள், கத்தாருக்கு 13 நிபந்தனைகளை முன் வைத்தன. அதனை ஏற்றுக் கொள்வதன் மூலம் தடைகளை விலக்கிக் கொள்வதாக அறிவித்தன. அந்த பட்டியலில்,

1) அரசு ஆதரவுடன் செயல்படும் அல் ஜசீரா தொலைக்காட்சியை மூட வேண்டும்.

2) ஈரான் உடனான நெருக்கத்தை குறைக்க வேண்டும்.

3) கத்தாரில் உள்ள துருக்கி ராணுவ முகாமை மூட வேண்டும்.

உள்ளிட்ட நிபந்தனைகள் வைக்கப்பட்டன. இவற்றை அடுத்த 10 நாட்களுக்குள் ஏற்றுக் கொள்ள வேண்டும் என்றும் கூறியது. ஆனால் கத்தார் அதற்கு மறுத்துவிட்டது. அதனால் கத்தார் உடனான மோதல் போக்கு தொடர்ந்து வருகிறது.

Qatar rejects 4 Nations demands.