அமெரிக்கா வாழ் இந்தியர்களுக்கு மகிழ்ச்சி!! ஹெச் 1பி விசாவில் மாற்றம் இல்லை!!

அமெரிக்காவில் ஹெச் 1பி விசா வைத்திருப்பவர்களை வெளியேற்றும் முடிவை அதிபர் டொனால்ட் டிரம்ப் அரசு எடுக்கவில்லை என்று அமெரிக்க அதிகாரிகள் தெரிவித்து இருப்பது அமெரிக்காவில் வாழும் இந்தியர்களுக்கு ஆறுதலாக அமைந்துள்ளது.

இந்த தகவலை அமெரிக்க குடியுரிமை மற்றும் குடியமர்த்தல் அமைப்பு உறுதிபடுத்தியுள்ளது. இந்த அமைப்பு எந்த மாற்றங்களையும் விசா நடைமுறைகளில் கொண்டு வரவில்லை என்றும் தெளிவுபடுத்தியுள்ளது. கடந்த சில நாட்களுக்கு முன்பு, ஹெச் 1பி விசா நடைமுறைகளில் அதிபர் டிரம்ப் அரசு மாற்றங்கள் கொண்டு வர முடிவு செய்துள்ளது. அப்படி கொண்டு வந்தால், அங்கு பணியில் இருக்கும் 7,50,000 இந்தியர்கள் பாதிக்கப்படுவார்கள் என்ற செய்தி வெளியானது. இதனால் அங்கு வாழும் இந்தியர்கள் இடையே கலக்கம் ஏற்பட்டது. இதற்கு நாஸ்காம் மற்றும் ஐடி நிறுவனங்கள் கடுமையான எதிர்ப்பு தெரிவித்து இருந்தன.

இந்த நிலையில் கடுமையான முடிவுகள் எடுக்காமல், ஹெச் 1பி விசா வைத்திருப்பவர்கள் பாதிக்கப்படாத வகையில், அதிபர் டிரம்ப்பின் கொள்கைகள் மற்றும் மாற்றங்களில் திருத்தம் கொண்டு வரப்படும் என்று குடியுரிமை அமைப்பு தெரிவித்துள்ளது. மேலும், எந்த கட்டாயத்தின் பேரிலும் மாற்றங்கள் கொண்டு வரப்படவில்லை. அப்படி வெளியாகும் தகவல்கள் தவறானது என்றும் குடியுரிமை தெளிவுபடுத்தியுள்ளது.