அமெரிக்க வெளியுறவுத்துறை செயலராக ரெக்ஸ் டில்லர்சன் பொறுப்பேற்பு

வாஷிங்டன்: அமெரிக்காவின் புதிய வெளியுறவுத்துறை செயலராக ரெக்ஸ் டில்லர்சன் பொறுப்பேற்றுக் கொண்டார்.

அமெரிக்க அதிபராக இருந்த ஒபாமாவின் பதவிக்காலம் முடிந்ததையொட்டி, நடைபெற்ற அடுத்த அதிபரை தேர்ந்தெடுக்கும் தேர்தலில் குடியரசுக் கட்சியைச் சேர்ந்த டொனால்ட் டிரம்ப் வெற்றி பெற்றார். அதனையடுத்து, அமெரிக்காவின் 45-வது அதிபராக டொனால்ட் டிரம்ப் பதவியேற்றுக் கொண்டார்.

அதிபராக பதவியேற்றுக் கொண்ட டிரம்ப், பல்வேறு அதிரடி நடவடிக்கைகளை எடுத்து வருகிறார். அதேபோல், ஒபாமா அரசின் கீழ் செயல்பட்டு வந்த அமைச்சர்களையும் மாற்றி தனது நம்பிக்கைக்குரியவர்களை நியமித்து வருகிறார்.

அதன்படி, டெக்சாஸ் மாகாணத்தை பூர்வீகமாகக் கொண்ட ரெக்ஸ் டில்லர்சனை, அமெரிக்காவின் புதிய வெளியுறவுத்துறை செயலராக தேர்வு செய்ய அந்நாட்டு செனட் சபை ஒப்புதல் அளித்தது. அதற்கான வாக்கெடுப்பில் 56-43 என்ற வாக்குகளை பெற்று ரெக்ஸ் டில்லர்சன் ஒப்புதலை பெற்றார். தொடர்ந்து, அமெரிக்காவின் புதிய வெளியுறவுத்துறை செயலராக அவர் பொறுப்பேற்றுக் கொண்டார். அவருக்கு வயது 64.

ரெக்ஸ் டில்லர்சனுக்கு அமெரிக்க துணை அதிபர் பதவிப் பிரமாணம் செய்து வைத்தார். அப்போது, இந்த தருணத்திற்காக தான் உங்கள் ஒட்டுமொத்த வாழ்க்கையும் உங்களை தயார் படுத்தியுள்ளது என டில்லர்சனிடம் அதிபர் டிரம்ப் தெரிவித்தார்.

ஒபாமா அரசின் கீழ் வெளியுறவுத்துறை செயலர்களாக செயல்பட்ட ஜான் கெர்ரி 94-3 வாக்குகளையும், ஹிலாரி கிளிண்டன் 94-2 வாக்குகளையும் பெற்று அந்த பதவிக்கு தேர்வாயினர் குறிப்பிடத்தக்கது.
Rex Tillerson sworn in as US secretary of state