ஆஸ்திரேலியாவில் ஓரினச்சேர்க்கை திருமணத்திற்கு அனுமதி.!

ஆஸ்திரேலிய நாடாளுமன்றத்தில் ஓரினச் சேர்க்கை திருமண மசோதா பெரும்பான்மை ஆதரவுடன் நிறைவேற்றப்பட்டு நடைமுறைக்கு கொண்டு வரப்பட்டது.

ஆஸ்திரேலிய நாடாளுமன்ற மேலவையில் ஓரினச்சேர்க்கை திருமண சட்ட மசோதா கடந்த வாரம் நிறைவேற்றப்பட்டது. இதைத் தொடர்ந்து இந்த மசோதா நேற்று முன்தினம் மக்களவையில் தாக்கல் செய்யப்பட்டது. மொத்தமுள்ள 150 உறுப்பினர்களில் 146 பேர் மசோதாவுக்கு ஆதரவு அளித்தனர். 4 பேர் மட்டுமே எதிர்ப்பு தெரிவித்தனர். இதைத் தொடர்ந்து பெரும்பான்மை ஆதரவுடன் ஓரினச் சேர்க்கை திருமண மசோதா நிறைவேற்றப்பட்டது.

நெதர்லாந்து, பெல்ஜியம், கனடா, ஸ்பெயின், தென்ஆப்பிரிக்கா, அமெரிக்கா உட்பட உலகம் முழுவதும் 25 நாடுகளில் ஓரினச்சேர்க்கை திருமணம் அங்கீகரிக்கப்பட்டுள்ளது. தற்போது 26-வது நாடாக ஆஸ்திரேலியா இந்த பட்டியலில் இணைந்துள்ளது.

புதிய சட்டத்தின்படி ஓரினச்சேர்க்கை ஜோடிகள் திருமணத்திற்கு ஒரு மாதத்துக்கு முன்பாக விண்ணப்பிக்க வேண்டும். இந்த நடைமுறை வரும் சனிக்கிழமை தொடங்குவதன் மூலம், ஓரினச் சேர்க்கையை சட்டப்பூர்வமாக்கி ஆஸ்திரேலிய நாடு அறிவித்துள்ளது.