அரசியல் பேசாதீர்கள்:சவுதி இமாம்களுக்கு தடை..!

மதப் பிரசங்கங்களின் போது அரசியல் தொடர்பான கருத்துகள் குறித்து பேச வேண்டாம் என சவுதியில் உள்ள இமாம்களுக்கு அந்நாட்டு அரசு தடை விதித்துள்ளது.

தற்போது சவுதி அரேபிய நாட்டில் சுமார் ஒரு லட்சத்திற்கும் மேற்பட்ட இமாம்களும்,மதப்பிரசங்கம் செய்பவர்களும் உள்ளனர்.இவர்களுக்கு சவுதியின் இஸ்லாமிய விவகாரங்களுக்கான அமைச்சகம் சார்பில் அனுப்பப்பட்டுள்ள உத்தரவில்,மசூதிகளில் மதப்பிரசங்கங்கள் செய்யும் போது நடப்பு அரசியல் நிலவரங்கள் குறித்தும்,இஸ்லாமிய நாடுகளுக்கு இடையேயான சண்டை சச்சரவுகள் குறித்தும் பேச வேண்டாம் என அறிவுறுத்தப்பட்டுள்ளது.

இஸ்லாமியர்களின் முக்கிய தொழுகை நாளான வெள்ளிக்கிழமையன்று மசூதிகளில் நடைபெறும் கூட்டங்களில்,இஸ்லாமிய மதத்தை சாராதவர்கள்,யூத நாடான இஸ்ரேல் மற்றும் ஷியா பிரிவு முஸ்லீம்களுக்கு எதிரான கருத்துகளை இமாம்கள் பேசி வருவதாக சவுதி அரேபிய அரசுக்கு புகார்கள் வந்தன.இதனை தொடர்ந்து இமாம்களுக்கு இந்த கட்டுப்பாட்டை சவுதி அரேபிய அரசு விதித்துள்ளது.

இதுமட்டுமல்லாமல் மசூதிகளில் இனி எந்தவித நன்கொடைகளும் வசூலிக்கக்கூடாது எனவும் ஏற்கனவே இமாம்களுக்கு கட்டுப்பாடு விதிக்கப்பட்டிருப்பது குறிப்பிடத்தக்கது.