அமெரிக்க விசா கட்டண உயர்வு: உலக வர்த்தக சபையில் முறையிட இந்தியா முடிவு

ஹெச் 1 பி மற்றும் எல்1 பிரிவுகளில் வழங்கப்படும் தற்காலிக விசா மீதான கட்டணத்தை, இருமடங்காக அமெரிக்கா உயர்த்துவதற்கு, இந்தியா அதிருப்தி தெரிவித்துள்ளது.

குறிப்பிட்ட விசா விதிமுறைகளின்கீழ், அமெரிக்கா வருவோர் அதனை முறைகேடாகப் பயன்படுத்துவதாகவும், ஏராளமான இந்தியர்கள் அமெரிக்கா வருவதால், உள்நாட்டு மக்களின் வேலைவாய்ப்பு பாதிக்கப்படுவதாகவும் அந்நாட்டு எதிர்க்கட்சிகள் புகார் கூறிவருகின்றன. இதையடுத்து, விசா கட்டணத்தை உயர்த்துவதாக, கடந்த டிசம்பரில் தாக்கல் செய்த பட்ஜெட்டில் அமெரிக்கா கூறியுள்ளது.

அதேசமயம், மேற்கண்ட விதிமுறைகளை இந்தியர்கள் தவறாகப் பயன்படுத்தவில்லை. இது இருநாட்டு வர்த்தக ஒப்பந்தங்களை மீறும் செயல் என்று கூறி, உலக வர்த்தக சபையில் மேல்முறையீடு செய்ய, இந்தியா திட்டமிட்டுள்ளது. மத்திய அரசின் இம்முடிவுக்கு, பெரும்பாலான ஐ.டி.,நிறுவனங்கள் ஆதரவு தெரிவித்துள்ளன.

திறமையான ஊழியர்களை, தற்காலிக பணி ஒப்பந்தங்களின் அடிப்படையில், இந்திய ஐ.டி.,நிறுவனங்கள் அமெரிக்கா அனுப்பி வருகின்றன. இதற்கு, ஹெச் 1பி மற்றும் எல் 1 விசா விதிமுறைகள் பெரும் உதவியாக உள்ளது.

திடீரென விசா கட்டணம் உயர்த்தப்படுவதால், தங்களின் வர்த்தகச் செலவு இருமடங்காக உயரும் வாய்ப்புள்ளதாக, ஐ.டி., நிறுவனங்கள் கவலை தெரிவித்துள்ளன.