“உன் நாட்டிற்கு திரும்ப செல்”! : அமெரிக்காவில் தொடரும் இனவெறி!

நியூயார்க் : சீக்கிய-அமெரிக்க பெண் ஒருவர் உள்ளூர் ரயிலில் பயணம் செய்து கொண்டிருந்த போது, அமெரிக்க இளைஞர் ஒருவர், மிரட்டிய சம்பவம் பெரும் பதற்றத்தை ஏற்படுத்தியுள்ளது.

ராஜ்பிரீத் ஹெய்ர் எனும் ரயிலில் பயணம் செய்து கொண்டிருந்தார். அப்போது அமெரிக்காவை சேர்ந்த ஆண் ஒருவர், இந்தப்பெண் லெபனானை சேர்ந்தவர் என்று தவறுதலாக புரிந்து கொண்டு, “லெபனானுக்கு திரும்ப செல், நீ இந்த நாட்டை சேர்ந்தவள் அல்ல” என்று கடுமையாக மிரட்டியுள்ளார். சமீபமாக தெற்காசியர்கள் மீதான வன்முறை அமெரிக்காவில் அதிகரித்து வருகிறது. தன்னுடைய தோழியின் பிறந்த நாள் நிகழ்ச்சிக்கு அந்த பெண் சென்று கொண்டிருக்கும் போது இச்சம்பவம் நிகழ்ந்துள்ளது. அமெரிக்க அதிபராக டொனால்ட் டிரம்ப் பதவியேற்ற பிறகு இனவெறி தாக்குதல் அதிகமாகி இருப்பது குறிப்பிடத்தக்கது.

ராஜ்பிரீத்தை அவ்வாறு திட்டிவிட்டு அந்த நபர் சென்றதும், ரயிலில் இருந்த அமெரிக்க பெண் அழுதுகொண்டே அதை பார்த்துக்கொண்டு இருந்துள்ளார். இரண்டு பெண்கள் ராஜ்பிரீத்திற்கு ஆறுதல் கூறியுள்ளனர். அதில் ஒருவர் ரயில்வே காவல்துறையிடம் இது குறித்து புகார் அளித்துள்ளார். கடந்த மாதம் இந்தியாவை பூர்வீகமாக கொண்ட ஏக்தா தேசாய், சமூக வலைதளத்தில் வீடியோ ஒன்றை பதிவேற்றம் செய்திருந்தார். அதில் ஆப்ரிக்க-அமெரிக்க இளைஞர்கள் சப்வே ரயிலில் பயணிக்கும் போது பட்டப்பெயர் வைத்து அழைப்பதாக கூறியிருந்தார். இரண்டு பேரை கொன்ற சம்பவமும் சமீபத்தில் அமெரிக்காவில் நிகழ்ந்துள்ளது குறிப்பிடத்தக்கது.