அசட்டு வேகத்தில் புதிய கொரோனா.. சிக்கிய 60 நாடுகள்.. WHO எச்சரிக்கை!

கடந்த ஆண்டின் இறுதியில் இங்கிலாந்தில் புதிய கொரோனா வைரஸ் பரவத் தொடங்கியது. ஏற்கெனவே பரவும் கொரோனாவை காட்டிலும் புதிய கொரோனா 70% அதிக வேகத்தில் பரவியது.

இப்புதிய கொரோனாவால் தொற்று பாதிக்கப்பட்டவர்களின் எண்ணிக்கை கட்டுக்கடங்காமல் உயர்ந்தது. இதையடுத்து, புதிய கொரோனா மற்ற நாடுகளுக்கு பரவிவிடாமல் தடுப்பதற்காக இந்தியா உள்பட பல்வேறு உலக நாடுகள் இங்கிலாந்து இடையேயான விமான பயணத்துக்கு தடை விதித்தன.

இருப்பினும், தடைகள் அமலுக்கு வருவதற்கு முன்பாகவே வெளிநாடுகளுக்குள் புதிய கொரோனா கசிந்துவிட்டது. இந்நிலையில், இதுவரை குறைந்தது 60 நாடுகளுக்காவது இங்கிலாந்தில் வெடித்த புதிய கொரோனா பரவியுள்ளதாக உலக சுகாதார அமைப்பு தெரிவித்துள்ளது.

கடைசி நாளில் டொனால்ட் ட்ரம்ப் செய்த காரியத்தை பாருங்க!
உலகளவில் 20 லட்சத்துக்கும் மேலானோர் கொரோனாவுக்கு பலியாகியுள்ளனர். அமெரிக்கா, ஐரோப்பிய நாடுகள், இந்தியா உள்ளிட்ட ஆசிய நாடுகளில் பொதுமக்களுக்கு தடுப்பூசி போடும் பணிகள் நடைபெற்று வருகின்றன. இதனால் மக்களுக்கு புது நம்பிக்கை பிறந்துள்ளது.

எனினும், புதுப் புது வகை கொரோனா வைரஸ்கள் கிளம்புவது கூடுதல் அச்சத்தை ஏற்படுத்துகிறது. இங்கிலாந்து போக, தென்னாப்பிரிக்காவில் வேறு ஒரு புதிய கொரோனா பரவி வருகிறது. சுவிச்சர்லாந்திலும் புதிய கொரோனா பரவி வருவதாக சந்தேகிக்கப்படுகிறது.

ஏழு நாட்களுக்கு முன்பு உலக சுகாதார அமைப்பு வெளியிட்ட தகவலில், இங்கிலாந்தில் கிளம்பிய புதிய கொரோனா 10 நாடுகளில் இருப்பதாக தெரிவித்தது. வெறும் ஒரு வாரத்தில் 60 நாடுகளுக்கு பரவியுள்ளதாக இப்போது தெரிவிக்கப்பட்டுள்ளது.