உலகின் குண்டான சிறுவனுக்கு சிறப்பு சிகிச்சை: ஒரே மாதத்தில் 31 கிலோ எடை குறைப்பு

உலகிலேயே மிகவும் குண்டான சிறுவனுக்கு, சிறப்பு சிகிச்சை மூலமாக, ஒரே மாதத்தில் 31 கிலோ உடல் எடை குறைக்கப்பட்டுள்ளது.

இந்தோனேசியாவின் மேற்கு ஜாவா மாகாணத்தில் உள்ள கரவங் என்ற பகுதியைச் சேர்ந்தவன் ஆர்யா பெர்மானா (11) என்ற சிறுவன். பிறக்கும்போது சாதாரண உடல் எடை கொண்டிருந்த ஆர்யா, திடீரென வளர வளர அதீத உடல் எடை அதிகரிப்பால் கடுமையாக அவதிப்பட்டு வந்துள்ளான்.

11 வயதில், 190 கிலோ எடை உள்ள அந்த சிறுவனின் உயிரை காப்பாற்ற எண்ணிய அவனது பெற்றோர், மருத்துவமனையில் சேர்த்தனர். இதையடுத்து கடந்த மாதம் அச்சிறுவனுக்கான மொத்த சிகிச்சையின் முதல் பகுதியான கேஸ்ட்ரிக் ஸ்லீவ் (gastric sleeve) என்ற ஐந்து மணி நேரம் நீடித்த சிறப்பு சிகிச்சையை மருத்துவர்கள் செய்து முடித்துள்ளனர்.

உலகிலேயே இந்த சிகிச்சையைச் செய்துகொண்ட மிகக் குறைந்த வயதுடையவர் ஆர்யா மட்டுமே. இதனால் கடந்த ஒரு மாத காலத்தில் அவனது உடல் எடை, 31 கிலோ குறைந்திருப்பதாக மருத்துவர்கள் தெரிவித்துள்ளனர்.

அடுத்த பன்னிரண்டு மாதங்களுக்குள் தொடர் சிகிச்சைகள் மூலம் ஆர்யாவின் இரைப்பையின் அளவைக் குறைத்து, மொத்தமாகச் சுமார் 100 கிலோ எடையைக் குறைக்கவுள்ளதாகவும் மருத்துவர்கள் தெரிவித்துள்ளனர்.

World’s heaviest child from Indonesia loses 31 kg after getting gastric band.