ஆயுத பூஜையில் ஒரு அமர்க்களம்; கரூரில் துவங்கப்பட்ட 90ஸ் கிட்ஸ் மிட்டாய் கடை!

1990 கால கட்டங்களில் தமிழகத்தில் பெட்டிக்கடைகள் மற்றும் சாலையோர கயிற்றுக் கட்டில் கடைகள் மிகவும் பிரபலம். இப்படிப்பட்ட கடைகளில் வயதான தாத்தா, பாட்டிகள் 90ஸ் கிட்ஸ் என்று செல்லமாக அழைக்கப்படும் 1990 காலகட்டங்களில் பிறந்து குழந்தைகளாக வளர்ந்து வந்த தற்போதைய இளைஞர்கள், இந்த கடைகளில் அதிக அளவில் ஈக்களாக மொய்த்துக் கொண்டிருப்பார்கள். 1990-களில் பள்ளிக்கு சென்று படித்த குழந்தைகளின் தின்பண்டமே இந்த மிட்டாய்கள் தான். காலம் மாற, மாற அந்த மிட்டாய்களும் மாறிவிட்டது. ஆனாலும், 90-ஸ் கிட்ஸ் பலரும் சின்ன வயதில் சாப்பிட்ட மிட்டாய்களை மறுபடி சுவைத்து பார்த்திட பல நாட்கள் ஏங்கியிருப்பார்கள்.

மைல் கல்லுக்கு ஆயுதபூஜை.. இது நம்ம லிஸ்ட்லயே இல்லையே!

அந்தவகையில் கரூரில் மீண்டும் அந்த மிட்டாய்கள் எல்லாத்தையும் பெரியவர்கள் முதல், இப்போது உள்ள குழந்தைகளிடம் வரை கொண்டு சேர்க்க 90-களில் விற்கப்பட்ட மிட்டாய்களை கஷ்டப்பட்டு தேடி அலைந்து வாங்கி வந்து கரூரைச் சேர்ந்த இளைஞர்கள் சிலர் ஆயுத பூஜை பண்டிகையான இன்று புதிதாக 90ஸ் கிட்ஸ் மிட்டாய் கடை ஒன்றை துவங்கி உள்ளனர்.

ஜவ்வு மிட்டாய், தேங்காய் மிட்டாய், தேன் மிட்டாய், அப்பளம், மம்மி டாடி பாக்கு என 90களில் சாப்பிட்ட 70-க்கும் மேற்பட்ட மிட்டாய் வகைகள் மற்றும் 50-க்கும் மேற்பட்ட‌ விளையாட்டு பொருட்கள் இந்த கடையில் விற்பனைக்காக வைக்கப்பட்டுள்ளன.