கரூர் வந்த ஒற்றுமை தீப சுடரொளி மாரத்தான் ஓட்டம்: உற்சாக வரவேற்பு!

கன்னியாகுமரி முதல் டெல்லி வரை செல்லும் ஒற்றுமை தீப சுடரொளி மாரத்தான் ஓட்டம் கரூர் மாவட்டம் வந்தடைந்தது. பள்ளி, கல்லூரி தேசிய மாணவர் படை மாணவர்கள் மற்றும் திருச்சி பட்டாலியன் குருப் கமாண்டர் குழுவினர் அதனை உற்சாகத்துடன் வரவேற்றனர்.

தேசிய மாணவர் படை இயக்கம் தோன்றி 75 ஆண்டுகள் நிறைவடைந்ததையொட்டி, கன்னியாகுமரி முதல் டெல்லி வரை ஒற்றுமை தீப சுடரொளி மாராத்தான் ஓட்டம் கன்னியாகுமரி முதல் டெல்லி வரை நடைபெறுகிறது.

கன்னியாகுமரியில் நவம்பர் 20 ஆம் தேதியன்று துவங்கிய ஒற்றுமை தீப சுடரொளி மாராத்தான் ஓட்டம், திருநெல்வேலி, மதுரை, திண்டுக்கல் வழியாக கரூர் மாவட்ட எல்லையான ஆண்டிப்பட்டி கோட்டை டோல்கேட்டிற்கு வந்தடைந்தது. கர்னல் கே.எஸ். பத்வார் SM 90 UP பட்டாலியன் என்சிசி, கர்னல் டி.எஸ் மாவிக், கர்னல் ஏ.என்.ஷா ஆகியோர் அடங்கிய மாரத்தான் குழு தினமும் 50 கிலோமீட்டர் தூரம் ஓடி வருகின்றனர்.

இவர்களுக்கு திருச்சிராப்பள்ளி 2 பட்டாலியன் குருப் கமாண்டர் கர்னல் சுனில் புத், கமாண்டிங் ஆபிசர் கர்னல் கோ சுவாமி மற்றும் லெப்ட்டினன்ட் கர்னல் அருண்குமார், சுபேதார் மேஜர் மாரிமுத்து ஆகியோர் கரூரில் உற்சாக வரவேற்பு அளித்தனர்.


இந்நிகழ்வில் பள்ளப்பட்டி மேல்நிலைப்பள்ளி தலைமை ஆசிரியர் அ. முகமது இஸ்மாயில் மற்றும் உதவி தலைமை ஆசிரியர் தாஜுதீன் ஆகியோரும் கலந்து கொண்டனர். இந்நிகழ்ச்சியை பள்ளப்பட்டி மேல்நிலைப்பள்ளி தேசிய மாணவர் படை அலுவலர் நாகூர் மீரான் மற்றும் கரூர் அரசு கலை அறிவியல் கல்லூரி தேசிய மாணவர் படை அலுவலர் விநாயகர் ஒருங்கிணைத்தனர்.

இம்மாரத்தான் ஓட்டத்தில் பள்ளப்பட்டி மேல்நிலைப்பள்ளி மற்றும் கரூர் அரசு கலை அறிவியல் கல்லூரி, கொங்கு கலை அறிவியல் கல்லூரியை சேர்ந்த தேசிய மாணவர் படை மாணவர்களும் கலந்து கொண்டனர்.