மதக் கலவரம்தான் பாஜகவின் மதுரை ஆயுதமா?: “முருகர் துணை”

திருக்கார்த்திகை தீப திருநாளில் திருப்பரங்குன்றத்தில் உள்ள மலையில் தீபம் ஏற்றப்படுவது வழக்கம். இந்த முறை முன்னாட்களில் மலைமேல் உள்ள காசிவிஸ்வநாதர் கோயிலில் நடத்தப்பட்டு வந்தது. அதாவது 1967ஆம் ஆண்டு வரை இந்த முறையில்தான் ஏற்றப்பட்டது.

இந்த காசிவிஸ்வநாதர் கோயில் செல்லும் வழியில் முஸ்லிம் மதத்தினருக்குச் சொந்தமான தர்கா ஒன்றும் உள்ளது. அதற்கென தனி வரலாற்றுச் சான்றும் உள்ளது. இந்த தர்காவைக் கடந்துதான் கார்த்திகை தீபம் எடுத்துச் செல்லப்பட்டு வந்தது.

அதன்பின் இந்து-முஸ்லிம் மதத்தினரிடையே இருந்த நட்பில் கலகம் ஏற்படுத்தப்பட்டது. இதன் காரணமாக ஏற்பட்ட பிரச்சினையால், கோயில் நிர்வாகம் கார்த்திகை தீபத்தை மலையில் உள்ள உச்சிப் பிள்ளையார் கோயிலில் ஏற்றத் தொடங்கியது. இந்த பிள்ளையார் கோயில் முஸ்லிம் தர்காவிற்கு முன்பாகவே உள்ளது.

இப்படி 30 ஆண்டுகளாக புதிய வழக்கமாக மாற்றப்பட்ட வழிபாட்டு முறையை வைத்துத்தான் மதுரையில் இந்துத்துவா அமைப்புகள் அரசியல் செய்ய தொடங்கியுள்ளன. திருக்கார்த்திகை நேரத்தில் காசிவிஸ்வநாதர் கோயிலில்தான் கார்த்திகை தீபம் ஏற்ற வேண்டும் என பாஜக உள்ளிட்ட இந்து அமைப்புகள் போராட்டம் நடத்தின.

அப்படி காசிவிஸ்வநாதர் கோயிலில் கார்த்திகை தீபம் ஏற்றினால், நிச்சயம் அது மதக் கலவரத்தைத் தூண்டும் என போலீசார் எச்சரிக்கை விடுத்துள்ளனர். ஆனால், இதைப் பற்றிக் கவலைப்படாமல் இந்து அமைப்புகள் பிடிவாதம் பிடிக்கின்றன. கலவரம் ஏற்பட்டாலும் பரவாயில்லை, என இந்து மத அமைப்புகள் மாவட்டத்தில் இயங்கி வருகின்றன.

சமீபத்தில் இந்து முன்னணி அமைப்பைச் சேர்ந்த மாவட்ட நிர்வாகிகள் 2 பேர் காசிவிஸ்வநாதர் கோயிலுக்குள் கார்த்திகை தீபத்தைக் கொண்டு சென்று அங்கு அதை ஏற்றினர். இது பெரும் பரபரப்பை ஏற்படுத்திய சூழலில், போலீசார் அதிரடி நடவடிக்கை மேற்கொண்டு மதக் கலவரத்தைத் தூண்ட முயன்ற 2 பேரையும் கைது செய்து சிறையில் அடைத்தனர். எனினும் இந்த முயற்சியைக் கைவிடாத இந்து அமைப்புகள் தொடர்ந்து இதுபோன்ற நடவடிக்கைகளையே எடுத்து வருகின்றன. இதுகுறித்து மக்கள், “மக்களின் பிரிவினையை வைத்து சண்டை ஏற்படுத்தாமல், ஒற்றுமையை உறுதி செய்தால், அரசியலில் தன்னால் லாபம் ஏற்படும்” என்கின்றனர்.