ஓபிஎஸ் மதுரை சென்டிமெண்ட்; திமுகவிற்கு மரண அடி கொடுக்குமா அதிமுக?

ஆளுங்கட்சியாக திமுக இருப்பதால் அக்கட்சியின் வெற்றி வாய்ப்பு அதிகமிருப்பதாக தகவல்கள் தெரிவிக்கின்றன. அதேசமயம் கொங்கு மண்டலம் மற்றும் சில தென் மாவட்டங்களில் அதிமுகவிற்கு சாதகமான முடிவுகள் வெளியாகும் என்று சொல்லப்படுகிறது. இதற்கிடையில் முன்னாள் முதல்வரும், அதிமுக ஒருங்கிணைப்பாளருமான ஓ.பன்னீர்செல்வத்தின் ’மதுரை சென்டிமெண்ட்’ அதிமுகவின் வெற்றி வாய்ப்பிற்கு கைகொடுக்குமா? என்று எதிர்பார்ப்பு ஏற்பட்டுள்ளது.

அதென்ன மதுரை சென்டிமெண்ட் என்று பலருக்கும் கேள்வி எழலாம். அதாவது, ஓ.பன்னீர்செல்வம் எங்கு தேர்தல் பிரச்சாரத்தை தொடங்கினாலும் இறுதியில் மதுரையில் தான் பிரச்சாரத்தை நிறைவு செய்ய வேண்டும் என்று விரும்புவாராம். அப்படியே மதுரை மீனாட்சி அம்மன் கோயிலுக்கு சென்று சாமி தரிசனம் செய்துவிட்டு தேனிக்கு புறப்பட்டு சென்றுவிடுவார் என்கின்றனர் ஓபிஎஸ்க்கு நெருங்கிய வட்டாரத்தினர்.

இது அதிமுகவின் வெற்றிக்கு பெரிதும் உதவும் என்று ஒரு நம்பிக்கை கொண்டுள்ளாராம். அந்த வகையில் 2022 நகர்ப்புற உள்ளாட்சி தேர்தலை ஒட்டி, காஞ்சிபுரத்தில் தான் தனது பிரச்சாரத்தை ஓ.பன்னீர்செல்வம் தொடங்கினார். அதன்பிறகு பல்வேறு மாநகராட்சிகளில் தொடர் பிரச்சாரம் செய்து, இறுதியில் மதுரை மாநகராட்சியில் பிரச்சாரத்தை நிறைவு செய்தார். மதுரையில் உள்ள பழங்காநத்தம் ரவுண்டானாவில் அதிமுக வேட்பாளர்கள் அறிமுகக் கூட்டம் நடைபெற்றது.

அதில் கலந்து கொண்டு வேட்பாளர்களை அறிமுகம் செய்து வைத்து பொதுமக்களிடம் வாக்கு சேகரித்தார். பின்னர் மீனாட்சி அம்மன் கோயிலுக்கு சென்று சாமி தரிசனம் செய்ததாக தெரிகிறது. அதன்பின்னர் பெரியகுளத்திற்கு திரும்பியுள்ளார். இதற்கிடையில் மாநகராட்சிகளில் மட்டும் ஓ.பன்னீர்செல்வம் கவனம் செலுத்திகிறார் என்று தேனி அதிமுகவிற்குள் எழுந்த குமுறலால் அம்மாவட்டத்தின் நகராட்சி, பேரூராட்சிகளிலும் பிரச்சாரம் செய்து முடித்தது குறிப்பிடத்தக்கது.

இதுதொடர்பாக நமது “சமயம் தமிழ்” இணையதளத்திலும் எக்ஸ்க்ளூசீவ் செய்தி ஒன்றை பதிவிட்டிருந்தோம். இங்கு கவனிக்க வேண்டிய விஷயம் என்னவென்றால் மதுரையில் தேர்தல் பிரச்சாரத்தை நிறைவு செய்வதும், மீனாட்சி அம்மனின் அருளை பெறுவதும் அதிமுகவின் வெற்றி வாய்ப்பிற்கு கூடுதல் பலம் சேர்க்கும் என்பது ஓ.பன்னீர்செல்வத்தின் நம்பிக்கையாக சொல்லப்படுகிறது.

எனவே ஓபிஎஸ் நினைத்தது போல் பல்வேறு மாவட்டங்களில் அதிமுக சர்ப்ரைஸ் வெற்றி பெறுமா? இல்லை முதல்வர் மு.க.ஸ்டாலினுக்கு கிடைத்த உளவுத்துறை ரிப்போர்ட்டில் இடம்பெற்றிருப்பது போல் கொங்கு மற்றும் தென் மண்டலத்தில் மட்டும் வெற்றி கனி பறிக்குமா என்பது 22ஆம் தேதி தெரிந்துவிடும் என்கின்றனர் அரசியல் நோக்கர்கள்.