மிஸ் ஜப்பான் பட்டம் வென்ற இந்தியப் பெண்!

'மிஸ் ஜப்பான் 2016' அழகிப்போட்டியில் இந்தியாவை பூர்வீகமாகக் கொண்ட ப்ரியங்கா யோஷிகாவா பட்டம் வென்றுள்ளார்.

ஜப்பானில், இந்தியா, ஆப்ரிக்கா, அமெரிக்கா, பிரான்ஸ், இங்கிலாந்து உள்ளிட்ட பல்வேறு நாடுகளைச் சேர்ந்த மக்களும் குடியேறி வசித்துவருகின்றனர். இவர்கள், ஜப்பான் நாட்டைச் சேர்ந்தவரையே திருமணமும் செய்துகொள்வதால், அவர்களுக்குப் பிறக்கும் குழந்தைகள், மற்ற நாடுகளைப் போல, ஜப்பான் குடிமக்களாகவே அங்கீகரிக்கப்படுகின்றனர்.

இதன்படி, ஆண்டுதோறும் ஜப்பானில் பிறக்கும் குழந்தைகளில், 2% கலப்பு இனத்தைச் சேர்ந்தவையாக உள்ளதாகக் கூறப்படுகிறது. இந்த குழந்தைகள், இளைஞர்களாகவும், இளம்பெண்களாகவும் வளர்ந்து, வாழ்க்கையின் அடுத்தக்கட்ட நகர்வுக்குச் செல்ல தொடங்கியுள்ளனர்.

ஜப்பானின் அனைத்துப் பிரிவு தொழில்களிலும், கலப்பின குழந்தைகள் ஆதிக்கம் செலுத்தத் தொடங்கியதைப் போலவே, தற்போது மிஸ் ஜப்பான் அழகிப் போட்டியிலும், இளம்பெண்கள் சாதித்து வருகின்றனர். கடந்த 2015ம் ஆண்டில் முதல்முறையாக, ஆப்ரிக்க, ஜப்பான் கலப்பினத்தைச் சேர்ந்த அரியானா மியாமோடோ என்பவர் மிஸ் ஜப்பான் பட்டம் வென்று, சாதனை படைத்தார்.

இந்நிலையில், 2016ம் ஆண்டுக்கான மிஸ் ஜப்பான் போட்டியில், இந்திய தந்தைக்கும், ஜப்பான் தாய்க்கும் பிறந்தவரான ப்ரியங்கா யோஷிகாவா பட்டம் வென்றுள்ளார். 22 வயதான இவர், அடுத்தக்கட்டமாக வரும் டிசம்பரில் நடக்கவிருக்கும் உலக அழகிப் போட்டியிலும் பங்கேற்க உள்ளார்.

எனினும், ப்ரியங்காவை மிஸ் ஜப்பான் என அறிவித்தது, ஏற்புடையதல்ல என்றும், அவர் அரை ஜப்பானியர் என்றும் அந்நாட்டு மக்களிடையே அதிருப்தி தெரிவிக்கப்படுகிறது. இருந்தபோதிலும், தான் இந்தியாவை பூர்வீகமாகக் கொண்டவள் என்பதில் மகிழ்ச்சி அடைவதாகவும், சர்ச்சைகளைப் பற்றி கவலையில்லை எனவும் ப்ரியங்கா குறிப்பிட்டுள்ளார்.