அமெரிக்காவின் நியூயார்க் நகர தெருவுக்கு பிள்ளையார் கோயில் பெயர்!

அமெரிக்காவின் நியூயார்க் நகரில் ஸ்ரீ மகா வல்லப கணபதி தேவஸ்தான கோவில் உள்ளது. கடந்த 1977 ஆம் ஆண்டு கட்டப்பட்ட இந்த விநாயகர் கோயில் வட அமெரிக்காவின் முதலாவது மற்றும் பழமையான இந்து கோவில் என்ற பெருமையை பெற்றுள்ளது. வட அமெரிக்கா இந்து கோயில் சங்கம் என்ற அமைப்பின் மூலம் இக்கோயில் நிர்வகிக்கப்பட்டு வருகிறது. தமிழ்நாட்டில் உள்ள பன்றிமலை சுவாமிகள் 26 இயந்திரங்கள் தயார் செய்து இங்கு அனுப்பியதாகவும், அவ்வியந்திரங்கள் சுமார் 5 ஆண்டுகள் பூஜையில் வைக்கப்பட்டதாகவும் இந்த கோவிலின் தல வரலாறு மூலம் அறிய முடிகின்றது.

இத்திருத்தலத்தின் மூலவர் ஸ்ரீ மகா வல்லப கணபதியாகும். மேலும் இத்தலத்தில் வெங்கடேஸ்வரர் என்ற பாலாஜி, ஸ்ரீதேவி, பூதேவி, மகாலட்சுமி, நரசிம்மர், சத்யநாரயணர், ஆஞ்சநேயர், நாகேந்திர சுவாமி, சண்முகர், சிவன், பார்வதி, காமாட்சி, சரஸ்வதி, தட்சிணாமூர்த்தி, துர்கை, நவகிரகம், அய்யப்பன், சொர்ண பைரவர், போன்ற அருள்மிகு தெய்வங்களை வணங்கிச் செல்வதற்கு மூர்த்திகள் உள்ளன. ராகவேந்தருக்கு தனியாக மூர்த்தியும் இங்கு உள்ளது.

குயின்ஸ் கவுண்டிக்கு உட்பட்ட பிளஷிங்கில் அமைந்துள்ள இந்த விநாயகர் கோயில், பவுனே என்ற தெருவில் உள்ளது. அமெரிக்காவின் மத சுதந்திரத்திற்காக போராடிய ஜான் பவுனே என்பவரை போற்றும் வகையில் இந்த தெருவுக்கு அவரது பெயர் சூட்டப்பட்டது. அந்த தெருவின் முனையில்தான் உள்ளது இந்த ஸ்ரீ மகா வல்லப கணபதி கோயில். தற்போது அந்த தெருவின் அடையாளமாகவும் இந்த கோயில் விளங்குகிறது.

இந்திய வம்சாவளியை சேர்ந்த இருவருக்கு முக்கிய பதவி: ஜோ பைடன் பரிந்துரை!
இந்த நிலையில்,அந்த கோயிலை கவுரவப்படுத்தும் விதமாக அந்த தெருவுக்கு பிள்ளையார் கோயில் தெரு (Ganesh Temple Street) என இணைப்பெயர் சூட்டப்பட்டுள்ளது. கடந்த 2ஆம் தேதி நடைபெற்ற இந்த பெயர் சூட்டு நிகழ்ச்சியில், அமெரிக்காவுக்கான இந்திய துணை தூதர் ரந்திர் ஜெய்ஸ்வால், நியூயார்க் மேயர் அலுவலக அதிகாரி எரிக் ஆடம்ஸ் மற்றும் அமெரிக்க வாழ் இந்தியர்கள் என பலரும் கலந்து கொண்டனர். நியூயார்க் நகர தெருவுக்கு பிள்ளையார் கோயில் பெயர் சூட்டப்பட்டுள்ளது அங்குள்ள அமெரிக்க வாழ் இந்தியர்களை மகிழ்ச்சியில் ஆழ்த்தியுள்ளது.