இந்திய வம்சாவளியை சேர்ந்த இருவருக்கு முக்கிய பதவி: ஜோ பைடன் பரிந்துரை!

அமெரிக்க அதிபராக ஜோ பைடன் பொறுப்பேற்றது முதல், இந்திய வம்சாவாளியை சார்ந்தவர்களுக்கு முக்கியத்துவம் கொடுத்து, முக்கியமான பதவிகளில் அவர்களை அமரச் செய்து வருகிறார். அண்மையில் நெதர்லாந்துக்கான அமெரிக்க தூதராக இந்திய வம்சாவளி பெண் ஷெஃபாலி ரஸ்தான் (50) என்பவரை அமெரிக்க அதிபர் ஜோ பைடன் நியமனம் செய்தார். அதேபோல், மொராக்கோவுக்கான அமெரிக்க தூதராக இந்திய வம்சாவளியை சேர்ந்த புனீத் தல்வார் என்பவரை அதிபர் ஜோ பைடன் நியமித்தார். இதுதவிர அமெரிக்க அரசு நிர்வாகத்திலும் இந்திய வம்சாவளியை சேர்ந்தவர்களுக்கு முக்கிய பொறுப்புகள் வழங்கப்பட்டு வருகின்றன.

அந்த வரிசையில், இந்திய வம்சாவளியை சேர்ந்த இருவரை முக்கியப் பதவிகளில் அமர வைக்க அமெரிக்க அதிபர் ஜோ பைடன் பரிந்துரைத்துள்ளார். சட்ட வல்லுனரும், சமூக உரிமை ஆர்வலருமான கல்பனா கோடகல் என்பவரை சமத்துவ வேலைவாய்ப்பு ஆணையத்தின் ஆணையர் பதவிக்கு ஜோ பைடன் பரிந்துரைத்துள்ளார். அதேபோல், இந்திய வம்சாவளியைச் சேர்ந்த கணக்கு தணிக்கையாளரான வினய் சிங் என்பவரை வீடு மற்றும் நகர்ப்புற வளர்ச்சி துறையின் தலைமை நிதி அதிகாரியாக அமெரிக்க அதிபர் ஜோ பைடன் பரிந்துரைத்துள்ளார்.

வேலைவாய்ப்பு, தொழிலாளர் நலன் உள்ளிட்ட சமூக உரிமைகளுக்காக கல்பனா கோடகல் பல வருடங்களாக போராடி வருகிறார். “கல்பனா கோட்டகல் ஒரு பன்முகத்தன்மை, சமபங்கு மற்றும் உள்ளடக்கல் நிபுணரும் ஆவார், மேலும் சம ஊதியச் சட்டம், ஊனமுற்ற அமெரிக்கர்கள் சட்டம், குடும்பம் மற்றும் மருத்துவ விடுப்புச் சட்டம் மற்றும் நியாயமான தொழிலாளர் தரநிலைகள் சட்டம் தொடர்பான சிக்கல்கள் சம்பந்தப்பட்ட வேலைவாய்ப்பு மற்றும் சிவில் உரிமைகள் வழக்குகளில் உரிமையற்ற மக்களைப் பிரதிநிதித்துவப்படுத்துகிறார்.” என்று வெள்ளை மாளிகை தெரிவித்துள்ளது.

ஹிஜாபுக்கு அனுமதி மறுப்பு: உணவகத்துக்கு சீல் - அதிரடி நடவடிக்கை!
அமெரிக்க நிறுவனங்களின் வர்த்தக வளர்ச்சிக்கும், முதலீட்டு கொள்கைகளை உருவாக்குவதிலும் வினய் சிங் முக்கிய பங்கு வகித்துள்ளார். ஒபாமா-பைடன் நிர்வாகத்தில் துணை உதவி செயலாளராவும் வினய் சிங் பணியாற்றியுள்ளார். அவர் முன்னணி வர்த்தகம் மற்றும் முதலீட்டு கொள்கை மற்றும் அமெரிக்க நிறுவனங்களுக்கு சிறந்த சந்தை நிலைமைகளை மேம்படுத்துவதற்கான முயற்சிகளில் முக்கிய பங்கு வகித்துள்ளார்.