கொளுத்தும் வெயிலில் மாணவர்களுடன் யோகா செய்த அமைச்சர் மா.சு..!

சர்வதேச யோகா தினத்தை முன்னிட்டு சேலம் ஜங்ஷன் பகுதியில் உள்ள சோனா தொழில்நுட்பக் கல்லூரியில் யோகா பயிற்சி நடைபெற்றது. இதில் தமிழக மக்கள் நல்வாழ்வுத்துறை அமைச்சர் மா. சுப்பிரமணியம் கலந்துகொண்டு யோகாசனம் செய்தார். இவருடன் 500-க்கும் மேற்பட்ட கல்லூரி மாணவ மாணவிகள் யோகாசனம் செய்தனர். குறிப்பாக மழலை குழந்தைகளின் யோகாசனம் காண்போரை வியக்க வைக்கும் வகையில் அமைந்திருந்தது. மேலும் வழக்கமாக காலை 8 மணிக்குள் நடைபெறும் யோகா பயிற்சி இன்று 10 மணிக்கு மேல் தொடங்கியதால் வெயிலின் தாக்கம் அதிகளவில் காணப்பட்டது. கொளுத்தும் வெயிலிலும் அமைச்சர் மாணவ, மாணவிகளுடன் யோகாசனப் பயிற்சி மேற்கொண்டது குறிப்பிடத்தக்கது.