என்.ஆர்.காங்கிரஸ்,பாஜக அதிமுகவுக்கு ஆதரவு-சிக்கலில் நாராயண சாமி..!

நெல்லித் தோப்பு இடைத்தேர்தலில் அதிமுக வேட்பாளருக்கு என்.ஆர்.காங்கிரஸ் மற்றும் பாரதிய ஜனதா ஆகிய கட்சிகள் ஆதரவு தெரிவித்துள்ளன.

வரும் நவம்பர் 19-ஆம் தேதி நடைபெற உள்ள புதுச்சேரி மாநிலத்தின் நெல்லித் தோப்பு தொகுதி இடைத்தேர்தலில் காங்கிரஸ் வேட்பாளர் நாராயணசாமி மற்றும் அதிமுக வேட்பாளர் ஓம் சக்தி சேகர் ஆகியோருக்கு இடையே இருமுனை போட்டி நிலவுகிறது.இந்த இடைத்தேர்தலில் வெற்றி பெற்றால் மட்டுமே முதல்வராக தொடர முடியும் என்பதால் வாழ்வா?சாவா? நிலையில் நாராயணசாமி போராடி வருகிறார்.இதற்காக தன்னுடைய கூட்டணி கட்சிகள் மட்டுமல்லாது,சில எதிர்கட்சிகளுக்கும் தூது அனுப்பினார்.

இதற்கு பலனாக மக்கள் நலக்கூட்டணியில் உள்ள விடுதலை சிறுத்தைகள் கட்சி,நாராயணசாமிக்கு ஆதரவளிப்பதாக தெரிவித்தது.ஆனால் மற்றொரு புறம் நாராயணசாமியை எப்படியாவது தோற்கடிக்க வேண்டும் என அதிமுக கங்கணம் கட்டிக்கொண்டு செயல்பட்டு வருகிறது.ஏற்கனவே தமிழகத்தில் பெரும்பான்மை மிக்க ஆளும்கட்சியாக இருப்பதால்,அந்த பலத்தை புதுச்சேரியில் காட்டி வெற்றியை சுவைக்க அதிமுக நினைக்கிறது.இதற்கு ஊக்கமளிப்பது போல புதுச்சேரியின் முன்னாள் முதல்வரான ரெங்கசாமி,தனது என்.ஆர் காங்கிரஸ் கட்சி அதிமுக வேட்பாளருக்கு ஆதரவளிப்பதாக தெரிவித்துள்ளார்.அவரை தொடர்ந்து பாரதிய ஜனதா கட்சியும் அதிமுக வேட்பாளருக்கு தனது ஆதரவை தெரிவித்துள்ளது.

புதுச்சேரில் காங்கிரஸ் கட்சிக்கு அடுத்த இடத்தில் உள்ள என்.ஆர் காங்கிரஸ் கட்சி,அதிமுக வேட்பாளருக்கு ஆதரவளித்துள்ளது நாராயணசாமியின் வெற்றி வாய்ப்பை தடுக்கும் என எதிர்பார்க்கப்படுகிறது.ஆனால் ஸ்டாலினின் பிரச்சாரம் மற்றும் ஆளுங்கட்சியாக இருக்கும் பலம் ஆகியவை தன்னை வெற்றிபெறச் செய்யும் என நாராயணசாமி நம்பிக்கையுடன் உள்ளார்.

N.R.congress support ADMK candidate in Nellithoppu byelection