சென்னையில் 6 வயது மகனை கொன்று தீ வைத்து கொளுத்திய பெண் கைது

சென்னை பூந்தமல்லியில் குடும்ப பிரச்சினை காரணமாக மகனை கொன்று தீ வைத்து கொளுத்திய தாய் கைது.

சென்னை, பூந்தமல்லியை அடுத்த கரையான்சாவடியை சேர்ந்தவர் ராஜேஷ்வரி. இவரது மகள் மீனாட்சி(வயது 27), இவர் கடந்த சில வருடங்களுக்கு முன்பு கிருஷ்ணகிரியை சேர்ந்த சரவணன் (32), என்பவரை காதலித்து திருமணம் செய்து கொண்டார். இவர் விதைகள் விற்பனை செய்யும் மார்கெட்டிங் நிறுவனத்தில் வேலை செய்து வருகிறார். இவர்களுக்கு ஜெயகாந்தன்(6), என்ற மகன் உள்ளார். இவர் அந்த பகுதியில் உள்ள பள்ளியில் 1ம் வகுப்பு படித்து வந்தான்.

இந்தநிலையில் கணவன், மனைவி இடையே அடிக்கடி தகராறு ஏற்படும் என்றும் அப்போது மீனாட்சி கோபித்துக்கொண்டு தனது தாய் வீட்டிற்கு வந்து விடுவார் என்றும் கூறப்படுகிறது. இந்த நிலையில் மீண்டும் கணவருடன் தகராறு ஏற்பட்டுள்ளது. இதனைத் தொடா்ந்து மகனுக்கு பள்ளி விடுமுறை என்பதால் கடந்த 27 ம் தேதி கரையான்சாவடியில் உள்ள தாய் வீட்டிற்கு இரவு வந்துள்ளார்.

அப்போது பெற்றோர் இவரை கண்டு கொள்ளாததால் அங்குள்ள தனி வீட்டில் மீனாட்சி தனது மகனுடன் தங்கியுள்ளார். காலையில் தனது மகனை கொலை செய்து விட்டதாக தெரிவித்தார். இதையடுத்து சம்பவ இடத்திற்கு பூந்தமல்லி போலீசார் விரைந்து வந்து விசாரணை செய்தனர். இதில் இரவு மகனுடன் வந்த மீனாட்சி வரும் போதே மண் எண்ணெய் வாங்கி வந்துள்ளார்.

இரவு ஜெயகாந்தன் அயர்ந்து தூங்கும் போது கழுத்தை நெரித்து கொலை செய்து விட்டு வீட்டின் பின் பகுதியில் உள்ள தொட்டியில் போட்டு மண் எண்ணெய் ஊற்றி தீ வைத்து கொளுத்தி விட்டு மாங்காட்டில் உள்ள கோவிலுக்கு சென்று மொட்டை போட்டுக்கொண்டு வந்துள்ளார்.

பின்னர் தானும் தற்கொலை செய்து கொள்ள முடிவு செய்துள்ளார். ஆனால் பயந்து போனதால் தற்கொலை செய்து கொள்ளாமல் இருந்து விட்டு போலீசாருக்கு தகவல் தெரிவித்து இருப்பது முதல் கட்ட விசாரணையில் தெரியவந்துள்ளதாக போலீசார் தெரிவித்தனர். மேலும் கைது செய்யப்பட்ட மீனாட்சியிடம் போலீசார் தொடர்ந்து விசாரணை செய்து வருகின்றனர். குடும்ப பிரச்சினையில் பெற்ற தாயே மகனை கொலை செய்து எரித்த சம்பவம் பெரும் பரபரப்பை ஏற்படுத்தி உள்ளது.