கமல் முதலமைச்சராவது அப்புறம் இருக்கட்டும்.?முதல கவுன்சிலரா வரச் சொல்லுங்க.!

நடிகர் கமல்ஹாசன் திரைப்படத்தில் வேண்டுமானால் முதலமைச்சராக நடிக்கலாம் என அமைச்சர் ராஜேந்திர பாலாஜி கடுமையாக சாடியுள்ளார்.

தமிழகத்தில் தற்போதைய அரசாங்கத்தை நடிகர் கமல் பயங்கரமாக விமர்சித்து வருகிறார். அரசு முழுவதும் ஊழல் நிறைந்து விட்டதாக, கமல் கூறியதால், தமிழக அமைச்சர்கள் அனைவரும் பயங்கரமாக அவரை சாடினர். சில அமைச்சர்கள் கமலிடம் வருமான வரித்துறை சோதனை செய்வோம், வழக்கு போடுவோம் என்று வெளிப்படையாக மிரட்டலும் விடுத்தனர். ஆனால் அதையெல்லாம் கண்டு கொள்ளாத கமல் ஊழல் குறித்த புகார்களை அமைச்சர்களுக்கு அனுப்புமாறு பொதுமக்களிடம் கூறினார். இதனை தொடர்ந்து புகார்கள் குவிந்த நிலையில் அனைத்து அமைச்சர்களின் மின்னஞ்சல் உள்ளிட்ட விவிரங்கள் தமிழக அரசின் இணையதளத்திருந்து நீக்கம் செய்யப்பட்டது. இதற்கு எந்த அமைச்சர்களும் சரியான விளக்கம் அளிக்கவில்லை.

தற்போது அரசியலில் அதிரடியாக இறங்கியுள்ள கமல் தொடர்ந்து அரசியல் தலைவர்களை சந்தித்த வண்ணம் இருக்கிறார். முன்னதாக கேரள முதலமைச்சரை சந்தித்த கமல் நேற்று டெல்லி முதல்வர் அர்விந்த கெஜ்ரிவாலை சந்தித்து பேசியது தமிழக அரசியலில் மீண்டும் பரபரப்பை ஏற்படுத்தியுள்ளது.

இதைத் தொடர்ந்து நேற்று ஆங்கில தொலைக்காட்சிக்கு நடிகர் கமல் அளித்த பேட்டியில், தமிழக மக்கள் விரும்பும் பட்சத்தில் முதலமைச்சராகவும் வர தயாராக இருக்கிறேன் என்று கூறினார். அதிகாரத்தினால் மட்டுமே மக்களுக்கு நன்மை செய்ய முடியுமென்றால் அந்த அதிகாரத்தை பயன்படுத்தி கொள்ள தயாராக இருப்பதாக கமல் தெரிவித்துள்ளார்.

கமலின் இந்த வெளிப்படையான அறிவிப்பால் தமிழக அமைச்சர்கள் மீண்டும் கொந்தளித்துள்ளனர். கமலின் அறிவிப்புக்கு பதிலடி கொடுக்கும் வகையில் இன்று செய்தியாளர்களை சந்தித்த அமைச்சர் ராஜேந்திர பாலாஜி, கமல்ஹாசன் திரைப்படத்தில் வேண்டுமானால் முதலமைச்சராக நடிக்கலாம் என்று கடுமையாக சாடியுள்ளார். முதலில் அவரை கவுன்சிலராக வரச் சொல்லுங்கள் என்று அமைச்சர் ராஜேந்திர பாலாஜி கடுமையாக விமர்சனம் செய்துள்ளார்.

Actor kamalhassan become a chief minister in only movie not reality-rajendira balaji m.l.a