அதிமுக - பாஜக கூட்டணி வெற்றி பெறும்: எப்படின்னு கணித்து சொல்லும் முன்னாள் நீதிபதி!

தமிழகத்தில் அடுத்த ஆண்டு சட்டமன்ற தேர்தல் நடைபெறவுள்ளது. இதற்காக அரசியல் கட்சிகள் தற்போதே களப்பணிகளை தொடங்கி விட்டன. கூட்டணி பேச்சுவார்த்தைகள், முதல்வர் வேட்பாளர், கூட்டணி கட்சிகளுக்கு இடங்களை ஒதுக்குவது என்பன உள்ளிட்ட பல்வேறு விஷயங்கள் அரசியல் களத்தில் அரங்கேறி வருகிறது.

எதிர்வரவுள்ள சட்டமன்ற தேர்தலில் அதிமுக - பாஜக கூட்டணி தொடருமா என்ற கேள்வி பரவலாக இருந்து வந்த நிலையில், அமித் ஷாவின் வருகை அதனை உறுதிபடுத்திச் சென்றுள்ளது. அரசு விழாவில் பேசிய அமித் ஷா, “முதலமைச்சர் எடப்பாடி பழனிசாமி தலைமையிலான ஆட்சி தொடரும் என நம்பிக்கை இருக்கிறது. அதிமுக ஆட்சிக்கு நாங்கள் உறுதுணையாக இருப்போம்” என்று மறைமுகமாக கூட்டணியை உறுதி படுத்தியுள்ளார்.

மேலும், தமிழகத்தில் பாஜக-அதிமுக கூட்டணி தொடரும் என முதல்வர் எடப்பாடி பழனிசாமியும், துணை முதல்வர் ஓ.பன்னீர்செல்வமும் தெரிவித்துள்ளனர். கிட்டத்தட்ட கூட்டணி உறுதி ஆகியிருக்கும் சூழலில், அதிமுகவினர் உள்ளடி வேலைகளை பார்த்துவிடக் கூடும் என்பதால் பல்வேறு அறிவுறுத்தல்களையும் அமித் ஷா கட்சியினருக்கு வழங்கியுள்ளார்.

இதெல்லாம் செஞ்சு கொடுங்க: அமித்ஷாவிடம் முதல்வர் கொடுத்த லிஸ்ட்

சென்னை பயணத்தின் போது, இரவு நீண்ட நேரம் தமிழக பாஜக நிர்வாகிகள் உடன் அமித் ஷா நடத்திய ஆலோசனைக்கு பின்னர் 40 தொகுதிகள் வேண்டும் என்று அதிமுகவிடம் பாஜக கோரிக்கை வைத்ததாக கூறப்படுகிறது. ஆனால், 25 தொகுதிகள் வரை மட்டுமே தர முடியும் என்று அதிமுகவினர் தெரிவித்ததாகவும் தகவல்கள் வெளியாகியுள்ளன. இதனிடையே, நாடு முழுவதும் சுற்றுப்பயணம் செய்யவுள்ள பாஜக தேசியத் தலைவர் ஜே.பி.நட்டா, சட்டமன்ற தேர்தல் வரவுள்ள தமிழகம் உள்ளிட்ட மாநிலங்களுக்கு முதகட்டமாக பயணம் செய்து உத்தி வகுக்கவுள்ளார்.


இந்த நிலையில், 2021ஆம் ஆண்டு தமிழக சட்டமன்ற தேர்தலில் அதிமுக-பாஜக கூட்டணி வெற்றி பெறும் என்று உச்ச நீதிமன்ற முன்னாள் நீதிபதி மார்கண்டேய கட்ஜு கணித்துள்ளார். இதுகுறித்து தனது முகநூல் பக்கத்தில், “அமித் ஷா ஏற்கனவே சென்னை வந்து சென்றுள்ளார். இன்னும் பல பாஜக தலைவர்களும் வரவுள்ளனர். இக்கூட்டணியின் வெற்றியை உறுதி செய்ய மத்திய அரசின் மிகப்பெரும் சக்தி பயன்படுத்தப்படும். நான் பாஜகவை சேர்ந்தவன் அல்ல. ஆனால், இது என் பார்வை" என்று பதிவிட்டுள்ளார்.