இன்று அதிமுக எம்எல்ஏக்கள் கூட்டம்: டிமிக்கி கொடுக்கும் டிடிவி தரப்பு!

முதல்வர் எடப்பாடி பழனிச்சாமி தலைமையில் இன்று அதிமுக எம்எல்ஏக்கள் கூட்டம் கட்சியின் தலைமை அலுவலகத்தில் நடைபெறுகிறது.

சென்னை ராயப்பேட்டையில் உள்ள அதிமுக தலைமைக் கழகத்தில் காலை 10 மணிக்கு கட்சியின் அனைத்து எம்எல்ஏக்கள் கூட்டம் நடக்கிறது. இக்கூட்டம் முதல்வர் எடப்பாடி பழனிசாமி மற்றும் துணை முதல்வர் ஓ.பன்னீர்செல்வம் தலைமையில் நடைபெறும் என தெரிவிக்கப்பட்டுள்ளது.

செப்டம்பர் 12ஆம் தேதி அதிமுக பொதுக்குழுக் கூட்டம் நடைபெறும் என அறிவிக்கப்பட்ட நிலையில், அதற்கு முன்பே எம்எல்ஏக்கள் கூட்டம் நடைபெறுவது முக்கியத்துவம் வாய்ந்ததாகக் கருதப்படுகிறது.

இக்கூட்டத்தில் கலந்துகொள்ள தினகரன் ஆதரவு எம்எல்ஏக்களுக்கும் அழைப்பு விடுக்கப்பட்டுள்ளது.

முதல்வர் எடப்பாடி பழனிசாமிக்கு தங்கள் நம்பிக்கையை இழந்துவிட்டதாகவும் புதிய முதல்வர் நியமிக்கப்பட வேண்டும் என்றும் ஆளுநரிடம் மனு அளித்த தினகரன் ஆதரவு எம்எல்ஏக்கள் தற்போது புதுச்சேரி சொகுசு விடுதியில் ஜாலியாக நேரம் கழித்து வருகின்றனர்.

இன்று நடைபெறும் அதிமுக எம்எல்ஏக்கள் கூட்டத்திற்கு அழைப்பு விடுக்கப்பட்ட போதிலும், தினகரன் ஆதரவு எம்எல்ஏக்கள் பங்கேற்கப்போவதில்லை என்று தினகரன் ஆதரவு எம்எல்ஏ தங்க தமிழ்ச்செல்வன் தெரிவித்துள்ளார்.