ரஜினியுடன் அதிமுக கூட்டணியா? ஓபிஎஸ் சொல்வது என்ன!

கடந்த 2017ஆம் ஆண்டில் தனது அரசியல் வருகை குறித்து அறிவித்த ரஜினிகாந்த், கொரோனா, உடல்நிலை உள்ளிட்டவைகளை சுட்டிக்காட்டி அரசியலில் இருந்து விலகுவதாக குறிப்பிடப்பட்டிருந்த கடிதம் ஒன்று சமூக வலைதளங்களில் வைரலானதற்கிடையே, கோடம்பாக்கத்தில் உள்ள ராகவேந்திரா திருமண மண்டபத்தில் தனது மக்கள் மன்ற நிர்வாகிகளுடன் ரஜினி ஆலோசனை மேற்கொண்டார்.

அதன்பின்னர், போயஸ் கார்டன் இல்லத்தில் செய்தியாளர்களை சந்தித்த அவர், எவ்வளவு சீக்கிரம் எனது முடிவை அறிவிக்க முடியுமோ, அவ்வளவு விரைவில் எனது முடிவை அறிவிப்பேன் என்று கூறிவிட்டு சென்றார்.

எனவே அவர் எப்போது அறிவிப்பார் என மீண்டும் ரசிகர்கள் எதிர்பார்க்கத் தொடங்கிய நிலையில், ஜனவரியில் கட்சித் துவங்கப்போவதாகவும், அதன் தேதியை டிசம்பர் 31ஆம் தேதி அறிவிக்கப்போவதாகவும் தமது ட்விட்டர் பக்கத்தில் ரஜினிகாந்த் பதிவிட்டார். அதன் தொடர்ச்சியாக, செய்தியாளர்களை சந்தித்த அவர், “சட்டமன்ற தேர்தலுக்கு முன்னால் கட்சி ஆரம்பிது போட்டியிடுவேன் என்று அறிவித்து இருந்தேன் அதே போல் கட்சி ஆரம்பிப்பேன். என் உயிரே போனாலும் மக்களே முக்கியம் என களம் இறங்கி உள்ளேன். வெற்றி பெற்றால் அது மக்களின் வெற்றி தோல்வி என்றால் அது மக்களுடைய தோல்வி” என்றார்.

குறுகிய காலத்தில் ஆட்சியை பிடிக்க ரஜினி நினைப்பது அதீத நம்பிக்கை - திருமாவளவன்

ரஜினியின் அரசியல் வருகை குறித்த திட்டவட்ட அறிவிப்பால் அவரது ரசிகர்கள் மகிழ்ச்சியடைந்துள்ளனர். மாநிலம் முழுவதும் பட்டாசு வெடித்து ரஜினி ரசிகர்கள் கொண்டாடி வருகின்றனர். அவரது அரசியல் வருகையை பல்வேறு அரசியல் கட்சித் தலைவர்களும் வரவேற்றுள்ளனர்.

இந்த நிலையில், வாய்ப்பிருந்தால் ரஜினியுடன் கூட்டணி அமைப்போம் என்று அதிமுக ஒருங்கிணைப்பாளர் ஓபிஎஸ் தெரிவித்துள்ளார். ரஜினி அரசியல் கட்சி தொடங்கியிருப்பது வரவேற்கத்தக்கது. அவரது வரவு நல்வரவாக இருக்கட்டும் என்று தெரிவித்த ஓபிஎஸ், அரசியலில் என்ன மாற்றம் வேண்டுமானாலும் நிகழலாம். வாய்ப்பிருந்தால் ரஜினியுடன் கூட்டணி அமையும் என்றார்.

முன்னதாக, ரஜினியின் பேட்டியை முழுமையாகப் பார்க்கவில்லை. அதனை பார்த்த பின்னர் கருத்து கூறுவதாக ரஜினியுடன் அதிமுக கூட்டணி அமைக்குமா என்ற கேள்விக்கு பதிலளித்த முதல்வர் பழனிசாமி தெரிவித்திருந்தார் என்பது குறிப்பிடத்தக்கது.