சென்னை : தமிழகத்தில் மாவட்டம் தோறும் நவீன தொழில்நுட்ப வசதிகள் கொண்ட "அம்மா இ-கிராமம்" உருவாக்கப்படும் என்று தமிழக முதல்வர் எடப்பாடி பழனிச்சாமி தெரிவித்துள்ளார்.
தமிழக அரசின் சார்பில் தகவல் தொழில்நுட்பவியல் சார்ந்த அறிவிப்புகளை விதியெண் 110-ன் கீழ் வெளியிட்டுள்ளார் .அதில் ," தமிழகத்தில் உள்ள ஒவ்வொரு மாவட்டத்திலும் ‚அம்மா இ-கிராமம் என ஒரு கிராமம் தெரிவு செய்யப்பட்டு, அந்த கிராமத்திற்கு, தகவல் தொழில் நுட்பவியல் வசதியினை கொண்ட கம்பியில்லா ஹாட்ஸ்பாட் (WiFi Hotspot), திறன்மிகு தெரு விளக்குகள் ((Smart Street Lighting ), தொலைக்கல்வி (Tele Education ), தொலை மருத்துவம் (Tele Medicine) போன்ற சேவைகள் வழங்கப்படும்.
தமிழ்நாடு அரசு கேபிள் டிவி மற்றும் தமிழ்நாடு மின்னணு நிறுவனங்களின் கூட்டாண்மை சமூகப் பொறுப்பு நிதியிலிருந்தும் ) மற்றும் அந்தந்தத் துறைகளின் திட்ட ஒதுக்கீட்டிலிருந்தும், தமிழ்நாடு மின்ஆளுமை முகமையின் மூலம் இத்திட்டம் செயல்படுத்தப்படும். இதன்மூலம் ஊராட்சி அளவில் இது வரை கிடைக்கப் பெறாத நவீன தொழில்நுட்ப அடிப்படையிலான சேவைகளை கிராமங்களுக்குக் கொண்டு செல்ல முடியும்.
அதாவது, மின்வகுப்பறைகள் மூலம் பிற இடங்களில் நடத்தப்படும் சிறப்பான பாடத் திட்டங்களை காணொலிக்காட்சி மூலமும், இணையவழி மூலமும் கிராமப் பள்ளிகளை அடையச் செய்யலாம். அதுபோன்றே பெரிய நகரங்களில் உள்ள சிறப்பு மருத்துவர்களின் ஆலோசனைகளை கிராமத்தில் இருந்து கொண்டே தொலைமருத்துவம் மூலம் பெற்றுக் கொள்ளலாம்." என்று அதில் தெரிவிக்கப்பட்டுள்ளது.