ஸ்டாலினுக்கு ஆலோசனை வழங்க தயாராகும் பாமக..!

தமிழகத்தின் முதல்வராக திமுக தலைவர் ஸ்டாலின் இன்று ஆளுநர் பன்வாரிலால் புரோகித் முன்னிலையில் பதவியேற்றுக்கொண்டார். ஆளுநர் மாளிகையில் நடந்த இந்த பதவியேற்பு நிகழ்ச்சிக்கு திமுக எம்.பி.கள், எம்.எல்.ஏ.க்கள், கட்சி நிர்வாகிகள் உள்ளிட்டோர் கலந்துகொண்டனர்.

அத்துடன், வைகோ, திருமாவளவன், ஈஸ்வரன், முத்தரசன், கே.பாலகிருஷ்ணன் உள்ளிட்ட கூட்டணி கட்சிகளின் தலைவர்களும், அதிமுக ஒருங்கிணைப்பாளர் ஓ.பன்னீர்செல்வம், தனபால், நவநீதகிருஷ்ணன் உள்ளிட்டோரும் பங்கேற்றனர். முதல்வராக பதவியேற்று தலைமை செயலகம் சென்ற ஸ்டாலின் முதலாவதாக 5 திட்டங்களை கொண்ட கோப்பில் கையெழுத்திட்டார்.

பால் விலை லிட்டருக்கு ரூ.3 குறைத்தல், அனைத்து மகளிருக்கும் சாதாரண கட்டண நகரப்பேருந்துகளில் கட்டணமின்றி பயணிக்கலாம். தனியார் மருத்துவமனைகளில் கொரோனா சிகிச்சைக்கான கட்டணத்தை தமிழக அரசே காப்பீட்டு திட்டத்தின் கீழ் ஏற்கும்,கொரோனா நிவாரணமாக குடும்பத்துக்கு முதல் தவணையாக ரூ.2 ஆயிரம், 'உங்கள் தொகுதியில் முதலமைச்சர்' என்ற திட்டத்தை செயல்படுத்த தனித்துறை ஆகிய 5 திட்டங்களுக்கு ஸ்டாலின் கையெழுத்திட்டுள்ளார்.

மு.க.ஸ்டாலினின் அறை இதுதான்..! இந்த இருக்கைக்கு 10 ஆண்டுகள் காத்திருப்பு

இதனை நல்ல தொடக்கம் என்று திமுக ஆதரவு கட்சி தலைவர்கள் பாராட்டி வருகின்றனர். இந்நிலையில் பாமக இளைஞரணி தலைவர் அன்புமணி ராமதாஸ் ஸ்டாலினுக்கு ட்விட்டரில் வாழ்த்து தெரிவித்துள்ளார்.

அன்புமணி ட்விட்டர் பதிவில், தமிழ்நாட்டின் புதிய முதல்வராகப் பதவியேற்றுள்ள திமுக தலைவர் மு.க.ஸ்டாலினுக்கு எனது உளப்பூர்வமான வாழ்த்துகளைத் தெரிவித்துக் கொள்கிறேன். தமிழக மக்கள் விரும்பும் ஆட்சியை அவர் வழங்க வேண்டும். அதற்கான ஆலோசனைகளை பாட்டாளி மக்கள் கட்சி எப்போதும் வழங்கும்'' என்று அன்புமணி தெரிவித்துள்ளார்'' என இவ்வாறு அதில் கூறப்பட்டுள்ளது.