ஜெயலலிதாவின் உடல் நலம் குறித்து இதுவரையிலான அப்போலோவின் அறிக்கைகள்!

சென்னை அப்போலோ மருத்துவமனை இதுவரை முதலமைச்சர் ஜெயலலிதாவின் உடல்நலம் தொடர்பாக 12 அறிக்கைகளை வெளியிட்டுள்ளது. அவற்றைப்பற்றி விரிவாக பார்க்கலாம்!

23.09.16 – முதலமைச்சர் ஜெயலலிதா காய்ச்சல் மற்றும் நீர்ச்சத்து குறைபாடு காரணமாக சென்னை அப்போலோ மருத்துவமனையில் அனுமதிக்கப்பட்டார். அவரை பரிசோதித்த மருத்துவர்கள் உடல் நலம் சீராக இருப்பதாக தெரிவித்தனர்

24.09.16 – தொடர்ந்து முதலமைச்சர் ஜெயலலிதாவின் உடல் நிலை பரிசோதிக்கப்பட்டு, கண்காணிக்கப்பட்டு வருவதாக மருத்துவமனை நிர்வாகத்தினர் தெரிவித்தனர். மேலும் அவர் வழக்கமாக சாப்பிடும் உணவை உட்கொள்வதாகவும் கூறினர்.

25.09.16 – காய்ச்சல் குறைந்திருப்பதாகவும், வழக்கமாக உண்ணும் உணவை உட்கொள்வதாகவும் தெரிவிக்கப்பட்டது.

29.09.16 – சமூக வலைதளங்களில் வெளிவரும் செய்தியை நம்ப வேண்டாம் என்றும், வெளிநாடு கொண்டு சென்று முதலமைச்சருக்கு சிகிச்சை அளிக்க வேண்டிய அவசியம் இல்லை என்றும் மருத்துவமனை நிர்வாகம் தெரிவித்தது. சில நாட்கள் மருத்துவமனையில் தங்கியிருந்து சிகிச்சை எடுத்துக்கொண்டால் போதும் என்று தெரிவிக்கப்பட்டது.

03.10.16 – முதலமைச்சர் ஜெயலலிதாவுக்கு அளிக்கப்பட்ட சிகிச்சைகள் நல்ல பலன் தந்ததாக மருத்துவர்கள் தெரிவித்தனர்.

06.10.16 – டெல்லி எய்ம்ஸ் மருத்துவமனை மருத்துவர்கள் 3 பேர், அப்போலோ மருத்துவமனைக்கு வருகை தந்தனர். மேலும் அப்போலோவில் முதல்வருக்கு அளிக்கப்படும் சிகிச்சை குறித்து கேட்டறிந்தனர். 7ம் தேதி வரை எய்ம்ஸ் மருத்துவர்கள் சென்னையில் தங்கியிருந்து முதல்வரின் உடல் நிலையை கவனித்து கொண்டனர். செப்டம்பர் 30ம் தேதி சென்னைக்கு வந்து சிகிச்சை அளித்த லண்டன் மருத்துவர் ரிச்சர்ட் பேல் மீண்டும் சென்னைக்கு வந்து ஜெயலலிதாவின் உடல் நலத்தை சோதித்ததாக அப்போலோ நிர்வாகம் தெரிவித்தது.

10.10.16 – எய்ம்ஸ் நுரையீரல் சிகிச்சை நிபுணர் கிலானி அப்போலோ நிபுணர் குழுவுடன் ஆலோசனை நடத்தினார்.

21.10.16 – மூத்த இதய சிகிச்சை நிபுணர்கள், தொற்று நோய் நிபுணர்கள் மற்றும் நீரிழிவு நிபுணர்கள் முதலமைச்சர் ஜெயலலிதாவுக்கு சிகிச்சை அளித்தனர். அப்போது முதலமைச்சர் பேசியதாக கூட தெரிவித்தனர்.

04.12.16 - நேற்று மாலை திடீரென முதலமைச்சர் ஜெயலலிதாவுக்கு மாரடைப்பு ஏற்பட்டதாக அப்போலோ நிர்வாகம் அறிக்கை வெளியிட்டது. தற்போது தீவிர மருத்துவ கண்காணிப்பின் கீழ் ஜெயலலிதா உள்ளார்.