முதல்வர் விரைவில் நலம் பெறுவார்: ஜோதிடர் ஆருடம்

முதல்வர் ஜெயலலிதா, பூரண உடல்நலம் குணமடைந்து தற்போது இருப்பதை விட அதிக பலத்துடன் வலம் வருவார் என்று கேரளாவின் பிரபல ஜோதிடர் குருவாயூர் ஸ்ரீ சூரிய நம்பூதிரிகள் தெரிவித்து இருப்பதாக செய்தி வெளியாகி உள்ளது.

முதல்வர் ஜெயலலிதா விரைவில் குணமடைந்து வருவதாக அப்பல்லோ மருத்துவமனை செய்தி வெளியிட்டு வருகிறது. இந்நிலையில் சமீபத்தில் முதல்வர் உடல் நலம் பெற்று 2017ல் இருந்து நன்றாக பணியாற்றுவார் என்று ஆஸ்திரேலியாவைச் சேர்ந்த ஜோதிடர் தஹிசி டோத் கூறியதாக செய்தி வெளியானது.

இவர் தெரிவித்து இருந்ததாக வெளியான செய்தியில்,''உணவு மற்றும் மருந்து நச்சு காரணமாக பாதிக்கப்பட்டு உள்ளார். கடந்த 2014ல் இருந்து அவருக்கு உடல்நலம் பாதிக்கப்பட்டுள்ளது. தற்போது அவருக்கு சனி புத்தி மற்றும் குரு தசா நடக்கிறது'' என்று தெரிவித்து இருந்தார்.

இந்நிலையில், கேரளாவின், திருச்சூர் மாவட்டத்தில் உள்ள குருவாயூர் ஸ்ரீ சூரிய மங்களம் தாந்திரீக வித்யா பீடத்தின் சூரிய நம்பூதிரி நெல்லை மாவட்டம் மணிமுத்தாறு பகுதிக்கு கடந்த இரண்டு நாட்களுக்கு முன்பு வந்துள்ளார்.

அங்கு செய்தியாளர்களிடம் பேசிய சூரிய நம்பூதிரி, தமிழக முதல்வர் ஜெயலலிதாவின் உடல்நலக் குறைவுக்கு முக்கிய காரணங்களைத் தெரிவித்தார். முதல்வருக்கு ஜாதகத்தில் 2017 அக்டோபர் 27 வரை நேரம் சரியில்லை என்றும், முதல்வர் நலம் பெற தாந்தீரிக முறைப்படி பூஜை செய்தால் வெகு விரைவில் குணமடைவார் என்று கூறியதாக தகவல் வெளியாகியுள்ளது. இந்த செய்தி நெல்லை மாவட்ட அதிமுக பிரமுகர்களிடையே மிகுந்த மகிழ்ச்சியை ஏற்படுத்தி உள்ளது.

ஜோதிடர் தஹிசி டோத்தும், சூரிய நம்பூதிரி நம்பூதிரி கூறியிருப்பதும் ஒரே மாதிரி உள்ளது. இந்த நேரத்தில் முதல்வர் விரைவில் நலம் பெற்று தனது பணிகளை மேற்கொள்ள வேண்டும் என்று நாமும் வாழ்த்துவோம்.