பில்லா ஜெகன் திமுகவில் இருந்து தற்காலிக நீக்கம்

தூத்துக்குடியில் சகோதரரை சுட்டுக்கொன்றதாக போலீசார் கைது செய்துள்ள பில்லா ஜெகன் திமுகவில் இருந்து தற்காலிகமாக நீக்கப்பட்டுள்ளதாக அக்கட்சியின் பொதுச்செயலாளர் அறிவித்துள்ளார்.

தூத்துக்குடி மட்டக்கடை பகுதியைச் சேர்ந்த பில்லா ஜெகன், திமுக மாவட்ட இளைஞரணி அமைப்பாளராகவும், மாவட்ட விஜய் ரசிகர் மன்றத் தலைவராகவும் உள்ளார்.

சொத்து பிரிப்பது தொடர்பாக இவருக்கும், அவரது சகோதரர் சிமன்சன் என்பவருக்கும் இடையே தகராறு இருந்து வந்துள்ளது. நேற்று முன்தினம் இது தொடர்பாக இருவருக்கும் இடையே கடுமையான வாக்குவாதம் ஏற்பட்டபோது, பில்லா ஜெகன் துப்பாக்கியால் தனது சகோதரரை சுட்டுக் கொன்றார்.

இதையடுத்து உடலை மீட்டு விசாரணை நடத்திய போலீசார், தப்பியோடிய ஜெகனை தேடி வந்தனர். இந்த நிலையில், திருவனந்தபுரத்தில் பதுங்கியிருந்த அவரை தனிப்படை போலீசார் கைது செய்தனர்.

அவருடன் தங்கியிருந்த மேலும் 7 பேரையும் போலீசார் கைது செய்து, ரகசிய இடத்தில் வைத்து விசாரணை நடத்தி வருகின்றனர். இந்நிலையில், திமுகவில் இருந்து பில்லா ஜெகன் தற்காலிகமாக நீக்கப்பட்டுள்ளதாக அக்கட்சியின் பொதுச்செயலாளர் அன்பழகன் அறிவித்துள்ளார்.