கூட்டாட்சிக்கு எதிராக பாஜக, கெஜ்ரிவாலுக்கு ஆதரவு: ஸ்டாலின்

பாஜக அரசு கூட்டாட்சித் தத்துவத்தை அழித்தொழிக்கும் நோக்கில் செயல்படுகிறது என்று திமுக செயல் தலைவர் மு.க.ஸ்டாலின் கூறியுள்ளார்.

டெல்லி துணை நிலை ஆளுநர் மாளிகை அலுவலகத்தில் ஆறு நாட்களுக்கு மேல் முதல்வர் அரவிந்த் கேஜ்ரிவால் உள்ளிருப்புப் போராட்டம் நடத்தி வருகிறார். அவருடன் மாநில அமைச்சர்களும் உள்ளிருப்புப் போராட்டத்தில் ஈடுபட்டுள்ளனர்.

ரேஷன் பொருட்களை வீடுகளுக்கே சென்று வழங்கும் மாநில அரசின் திட்டத்துக்கு அனுமதி வழங்குவது, ஐஏஎஸ் அதிகாரிகள் வேலை நிறுத்தப் போராட்டத்தை முடிவுக்கு கொண்டுவருவது ஆகியவற்றை வலியுறுத்தி போராட்டம் நடத்துகின்றனர்.

இந்தப் போராட்டத்தை மேற்கொண்டிருக்கும் கெஜ்ரிவால் உள்ளிட்ட அமைச்சர்களை வலுக்கட்டாயமாக முறியடிக்க மத்திய அரசு முயற்சிக்கிறது என்று கெஜ்ரிவால் ட்விட்டரில் குற்றம்சாட்டியுள்ளார்.
இந்நிலையில், திமுக செயல் தலைவர் மு.க.ஸ்டாலின் இது குறித்து ட்விட்டரில் பதிவிட்டுள்ளார். “ஆளுநர் மாளிகையில் டெல்லி முதல்வர் அரவிந்த் கெஜ்ரிவாலின் போராட்டத்தை கவனித்து வருகிறேன். பாஜக அரசு கூட்டாட்சித் தத்துவத்தை அழித்தொழிக்கும் நோக்கில் செயல்படுகிறது. இப்போராட்டத்திற்கு டெல்லி முதல்வருக்கு என் ஆதரவைத் தெரிவித்துக்கொள்கிறேன்.” என்று அவர் கூறியுள்ளார்.