தென்தமிழகத்தில் இன்று கனமழைக்கு வாய்ப்பு.!

தென் தமிழகத்தின், கடலோர மாவட்டங்களில் இன்று கனமழை பெய்ய வாய்ப்புள்ளதாக இந்திய வானிலை ஆய்வு மையம் எச்சரித்துள்ளது.

சமீபத்தில் குமரி மாவட்டத்தை தாக்கிய ஓகி புயலால், பலத்த சேதாரங்கள் ஏற்பட்டது. விவசாய நிலங்கள் அடியோடு நாசமாகின. மேலும் கடலுக்கு சென்ற பல மீனவர்களின் நிலை இன்னும் தெரியவில்லை.

இந்நிலையில், இந்திய வானிலை ஆய்வு மையம் நேற்று வெளியிட்டுள்ள அறிக்கையில் கூறியிருப்பதாவது, கன்னியாகுமரி கடற்பகுதியில் ஏற்பட்டுள்ள வளிமண்டல மேலடுக்கு சுழற்சியால், கன்னியாகுமரி உள்ளிட்ட தென் தமிழகத்தின் கடலோர மாவட்டங்களில் இன்று கனமழை பெய்யும் என இந்திய வானிலை ஆய்வு மையம் எச்சரித்துள்ளது.

ஏற்கெனவே தென் தமிழகத்தில் கடந்த மூன்று நாட்களாக தொடர்ந்து கனமழை பெய்து வருகிறது. இந்நிலையில், இன்று தென் தமிழகத்தில் கனமழை பெய்ய வாய்ப்புள்ளதாக தேசிய பேரிடர் மேலாண்மை வாரியம் எச்சரித்துள்ளது குறிப்பிடத்தக்கது.