வடதமிழகத்தில் மழைக்கு வாய்ப்பு; சென்னை வானிலை மையம்!

வட தமிழகத்தின் அனேக இடங்களிலும், தென் தமிழகத்தின் ஒருசில இடங்களிலும் மழை பெய்ய வாய்ப்புள்ளதாக சென்னை வானிலை ஆய்வு மையம் அறிவித்துள்ளது.

சென்னை வானிலை ஆய்வு மைய இயக்குநர் கே. பாலச்சந்திரன் இன்று செய்தியாளர்களை சந்தித்தார். அப்போது அவர் கூறியதாவது;
அரபிக்கடல் பகுதியில் காற்றழுத்த தாழ்வு பகுதி தொடர்ந்து நீடிக்கிறது. மேலும் ஈரப்பதத்துடன் கூடிய கிழக்கு திசைக்காற்றும், மேற்கு திசை காற்றும் சந்திக்கின்ற பகுதி, தென்னிந்திய பகுதிகளில் நிலவுகிறது. இதன் காரணமாக அடுத்து வரும் 24 மணி நேரத்தில் வட தமிழத்தின் அனேக இடங்களிலும், தென் தமிழகத்தின் ஒருசில இடங்களிலும் மழை அல்லது இடியுடன் கூடிய மழை பெய்யக் கூடும். மேலும் திருவண்ணாமலை, கிருஷ்ணகிரி, தர்மபுரி, சேலம், ஈரோடு, கோவை, நீலகிரி உள்ளிட்ட மேற்கு மற்றும் வடமேற்கு மாவட்டங்களில் ஒரு சில இடங்களில் இடியுடன் கூடிய பலத்த மழைக்கு வாய்ப்புள்ளது.

சென்னை மற்றும் புறநகரை பொருத்தவரையில் மாலை மற்றும் இரவு நேரங்களில் நகரின் ஒருசில இடங்களில் மழை பெய்ய வாய்ப்புள்ளது. இவ்வாறு சென்னை வானிலை ஆய்வு மைய இயக்குநர் பாலச்சந்திரன் கூறியுள்ளார்.