நம்பிக்கை வாக்கெடுப்பு: திமுக மனு மீது இன்று விசாரணை

சென்னை: நம்பிக்கை வாக்கெடுப்பு குறித்த திமுக-வின் மனு மீது சென்னை உயர் நீதிமன்றம் இன்று விசாரணை நடத்துகிறது.

பெரும்பான்மையை நிரூபிக்கும் பொருட்டு தமிழக சட்டப்பேரவை கடந்த 18-ம் தேதி கூடியது. அப்போது, ரகசிய வாக்கெடுப்பு வேண்டும் என்பன உள்ளிட்ட சில கோரிக்கைகளை வலியுறுத்தி வந்த திமுக-வினர், தொடர்ந்து அமளியில் ஈடுபட்டனர். இதனால், இரண்டு முறை பேரவை ஒத்தி வைக்கப்பட்டது. அதேபோல், அமளியில் ஈடுபட்ட திமுக-வினரை அவையில் இருந்து வெளியேற்ற சபாநாயகர் தனபால் உத்தரவிட்டார்.

இதற்கு எதிர்ப்பு தெரிவித்து, எதிர்க்கட்சித் தலைவர் ஸ்டாலின் உள்பட திமுக எம்எல்ஏ-க்கள் பேரவைக்குள் தரையில் அமர்ந்து தர்ணா போராட்டத்தில் ஈடுபட்டனர். அதனைத் தொடர்ந்து, சபாநாயகர் உத்தரவின் பேரில், எதிர்க்கட்சித் தலைவர் ஸ்டாலின் உள்பட திமுக எம்எல்ஏ-க்களை அவைக் காவலர்கள் குண்டுக் கட்டாக அங்கிருந்து வெளியேற்றினர். அப்போது நடைபெற்ற அமளியில், எதிர்க்கட்சித் தலைவர் ஸ்டாலினின் சட்டை கிழிக்கப்பட்டது. மேலும், அவைக் காவலர்கள் போல் சீருடை அணிந்து காவல்துறையினர் பேரவையின் உள்ளே வந்ததாகவும், தாங்கள் தாக்கப்பட்டதாகவும் திமுக-வினர் குற்றம் சாட்டினர்.

தீர்மானத்தை எடப்பாடி பழனிச்சாமி இரண்டு முறை முன்மொழிந்துள்ளார். எதிர்க்கட்சியினர் இல்லாமல் நம்பிக்கை தீர்மானம் நிறைவேற்றப்பட்டுள்ளது எனவே அது செல்லாது என்றும் திமுக-வினர் குற்றம் சாட்டி வந்தனர்.

இச்சம்பவம் தொடர்பாக ஆளுநரிடமும் திமுக-வினர் புகார் அளித்திருந்தனர். அதேபோல், இந்த விவகாரம் தொடர்பாக வழக்கு தொடரப்படும் என அக்கட்சியின் செயல் தலைவர் ஸ்டாலின் தெரிவித்திருந்தார்.

அதன்படி, தமிழக சட்டப்பேரவையில் நடைபெற்ற நம்பிக்கை வாக்கெடுப்பை செல்லாது என அறிவிக்கக் கோரி சென்னை உயர் நீதிமன்றத்தில் திமுக நேற்று முறையீடு செய்தது. முறையீட்டை விசாரித்த உயர் நீதிமன்றம், மனுவாக தாக்கல் செய்தால், விசாரணைக்கு ஏற்கப்பட்டு அவசர வழக்காக விசாரிக்கப்படும் என தெரிவித்துள்ளது.

அதனை ஏற்று திமுக தரப்பில் மனு தாக்கல் செய்யப்பட்டுள்ளது. இந்நிலையில், அந்த மனு மீதான விசாரணையை சென்னை உயர் நீதிமன்றம் இன்று நடத்துகிறது.
Chennai HC will hear DMK's plea on vote of confidence