சென்னை உயர் நீதிமன்றத்தின் புதிய நீதிபதிகள் இன்று பதவியேற்றனர்!

சென்னை உயர்நீதிமன்றத்தில் புதிதாக நியமிக்கப்பட்டுள்ள நீதிபதிகள் 7 பேர், தலைமை நீதிபதி இந்திரா பானர்ஜி முன்னிலையில் இன்று பதவியேற்றுக் கொண்டனர்.

சென்னை உயர்நீதிமன்றத்துக்கு புதிய நீதிபதிகளாக, ஆஷா, நிர்மல்குமார், சுப்பிரமணியம் பிரசாத், ஆனந்த் வெங்கடேஷ், இளந்திரையன், கிருஷ்ணன் ராமசாமி, சரவணன் ஆகிய 7 பேரை நியமித்து குடியரசு தலைவர் ராம்நாத் கோவிந்த் கடந்த 1-ந்தேதி உத்தரவு பிறப்பித்தார்.

இந்த உத்தரவை தொடர்ந்து 7 புதிய நீதிபதிகள் இன்றுபிற்பகலில்2 மணிக்கு நடைபெற்ற நிகழ்ச்சியில் சென்னை உயர்நீதிமன்ற நீதிபதிகளாக பதவியேற்றுக் கொண்டனர். இவர்களுக்கு தலைமை நீதிபதி இந்திரா பானர்ஜி பதவி பிரமாணம் செய்துவைத்தார்.

சென்னை நீதிமன்றத்திற்கு அனுமதிக்கப்பட்ட 75 நீதிபதிகளில், தற்போது 56 நீதிபதிகள் உள்ளனர். 7 கூடுதல் நீதிபதிகள் பதவியேற்பதால், இன்னும் 12 பணியிடங்கள் காலியாக இருக்கும் என்பது குறிப்பிடத்தக்கது.