ரூ.25 கட்டணத்தில் கிண்டி ஆளுநர் மாளிகையை பார்வையிடலாம்!

சென்னை : கிண்டி கவர்னர் மாளிகை பொதுமக்கள் பார்வையிடும் சுற்றுலா தளமாக அறிவிக்கப்பட்டுள்ளது.

சுமார் 156 ஏக்கர் பரப்பளவில் அமைந்துள்ள கிண்டி ஆளுநர் மாளிகையில் 6718 மரங்களும், 3.5 ஏக்கர் பரப்பளவில் காய்கறி தோட்டமும் உள்ளது. 698 புள்ளிமான்கள், 254 கலைமான்கள், எண்ணற்ற குரங்குகள், 80க்கும் மேற்பட்ட பறவைகள் இங்கு கூடுகட்டி வாழ்கின்றன. இவ்வளவு பசுமையான கவர்னர் மாளிகை சுற்றிப்பார்க்கும் இடமாக அறிவிக்கப்பட்டுள்ளது. வாரத்தில் வெள்ளி, சனி மற்றும் ஞாயிறுகளில் மாலை 4.30 மணி முதல் 6.30 மணி வரை கவர்னர் மாளிகையை பார்வையிடலாம் என்று கவர்னர் மாளிகை அறிவித்துள்ளது.

அதன்படி www.tnrajbhavan.gov.in என்ற இணைய தளத்தில் பதிவு செய்த 20 பேர் இன்று (21.04.17) கவர்னர் மாளிகையை சுற்றுப்பார்த்துள்ளனர். அடுத்தடுத்த நாட்களில் ஒவ்வொரு நாளும் 20 பேர் என்று பேட்டரி கார் மூலம் சுற்றிப்பார்க்க உள்ளனர். கவர்னர் மாளிகை இணையதளத்தில் ஆன்லைன் மூலம் ஒரு நபர் 25 ரூபாய் செலுத்தி முன்பதிவு செய்து கொள்ளலாம். அரசால் அங்கீகரிக்கப்பட்ட ஒரு அடையாள அட்டையை சமர்பித்து முன்பதிவு செய்ய வேண்டும். விண்ணப்பம் ஏற்றுக்கொண்டவுடன் சுற்றுப்பார்க்க ஒதுக்கப்பட்டுள்ள தேதி செல்போனுக்கு குறுந்தகவலாக வந்துவிடும்.

மேலும் கவர்னர் மாளிகையை சுற்றிப்பார்க்க வரும்போது செல்போன், கேமரா கொண்டுவரக்கூடாது என்று இணையதளத்தில் குறிப்பிடப்பட்டுள்ளது. தற்போது வரை மே மாதம் கடைசிவரை பொதுமக்கள் கவர்னர் மாளிகையை சுற்றிப்பார்க்க இணையம் மூலமாக பதிவு செய்துள்ளனர்.